प्रधानमन्त्री वालेन्द्र शाहले स्वदेशी जुत्ता–चप्पल उद्योगको प्रवर्द्धन, आयात प्रतिस्थापन, रोजगारी सिर्जना तथा निर्यात प्रवर्द्धनका लागि सरकार प्रतिबद्ध रहेको बताएका छन्। प्रधानमन्त्री तथा मन्त्रिपरिषद्को कार्यालयमा शुक्रबार फुटवेयर म्यानुफ्याक्चरर्स एसोसिएसन अफ नेपाल (एफएमएएन)का पदाधिकारी तथा सदस्यहरूसँगको छलफलमा उनले यस्तो धारणा राखेका हुन्।
नीतिगत सहजीकरणको प्रतिबद्धता
प्रधानमन्त्री शाहले छलफलमा उद्योगका लागि आवश्यक नीतिगत तथा संस्थागत सहजीकरण गर्न सरकार तयार रहेको स्पष्ट पारे। तीनै तहका सरकारको समन्वयमा जुत्ता निर्माणसम्बन्धी सीपमूलक तालिम सञ्चालन गरिने, नेपाली जुत्ता–चप्पलको ब्रान्डिङ, मार्केटिङ तथा बजार प्रवर्द्धनका लागि निजी क्षेत्रलाई प्रोत्साहित गरिने उनले बताएको प्रधानमन्त्रीको सचिवालयले जनाएको छ।
उत्पादन र बजार विस्तारमा जोड
उद्योगको उत्पादन क्षमताअनुसार कच्चा पदार्थ आयातको ट्र्याकिङ तथा अभिलेख व्यवस्थापनलाई प्रभावकारी बनाइने र स्वदेशी उत्पादनको प्रयोग, प्रवर्द्धन तथा बजार विस्तारमा विशेष जोड दिइने प्रधानमन्त्री शाहले बताए। यसले स्वदेशी उद्योगलाई बलियो बनाउने र आयातमुक्त हुने अपेक्षा गरिएको छ।