इंग्लिस प्रिमियर लिगमा म्यानचेस्टर सिटीले लिभरपुललाई उसैको घरेलु मैदान एनफिल्डमा ३-० गोलले पराजित गरेको छ। गएराति सम्पन्न खेलको पहिलो हाफ गोलरहित बराबरीमा टुंगिएको थियो, तर दोस्रो हाफमा सिटीले लगातार तीन गोल गर्दै खेलमा आफ्नो पकड जमायो।
सिटीलाई अग्रता दिलाउने काम ६५औँ मिनेटमा एर्लिङ हालान्डले गरे। त्यसको तीन मिनेटमै जेरेमी डोकुले दोस्रो गोल थपे भने ७८औँ मिनेटमा रयान चेर्कीले तेस्रो गोल गरेपछि सिटीको सहज जित सुनिश्चित भयो।
लिभरपुल भने ६२औँ मिनेटमा रायन ग्राभेनबर्चले रातो कार्ड खाँदा १० खेलाडीमा सीमित हुन पुगेको थियो। त्यसपछि सिटीले आक्रामक खेल जारी राख्दै गोल संख्या बढाएको हो।
यो नतिजासँगै सिटीले लिगमा लगातार छैटौँ जित हासिल गरेको छ। सिजनको सुरुवातदेखि राम्रो लयमा रहेको सिटीले उपाधि दौडमा आफ्नो दाबेदारी अझ बलियो बनाएको छ। घरेलु मैदानमा निराशाजनक हार बेहोरेको लिभरपुलले भने अंक गुमाएको छ।
अन्य खेलको नतिजा
गएराति नै भएका अन्य खेलमा क्रिस्टल प्यालेसले नटिङ्घम फरेस्टलाई ३-१ गोलले हराएको छ। यस्तै, हल सिटी र एभर्टनबीचको खेल २-२ गोलको बराबरीमा टुंगिएको छ।
आज राति पनि लिगको एक खेल हुँदैछ, जसमा कोभेन्ट्री सिटी र न्युक्यासल युनाइटेडबीच प्रतिस्पर्धा हुनेछ। कोभेन्ट्रीको घरेलु मैदानमा हुने यो खेल नेपाली समयअनुसार मंगलबार बिहान १२ः४५ बजे सुरु हुनेछ।
