रौतहटको लालबकैया नदीमा मंगलबार नुहाउने क्रममा बेपत्ता भएका तीन बालबालिकामध्ये दुईको शव बुधबार बिहान नदीमा फेला परेको छ। तेस्रो बालबालिकाको खोजी भने जारी छ।
जिल्ला प्रहरी कार्यालय रौतहटका अनुसार बुधबार बिहान करिब ७ बजे परोहा नगरपालिका-२ को जिङ्गडावा क्षेत्रस्थित लालबकैया नदीमा दुई शव देखा परेका थिए। बेपत्ता भएकामध्ये मोहम्मद रामतुल्लाह र सबनम खातुनका शव फेला परेको प्रहरीले पुष्टि गरेको छ।
नुहाउने क्रममा बेपत्ता
तीनै बालबालिका मंगलबार दिउँसो करिब १:५० बजे देवाही गोनाही नगरपालिका-२ स्थित लक्ष्मीनियाको लालबकैया नदीमा नुहाइरहेका थिए। सोही क्रममा उनीहरू बेपत्ता भएका हुन्। बेपत्ता हुनेमा लक्ष्मीनियाकै मोहम्मद रामतुल्लाह, सबनम खातुन र १० वर्षीय रौशन खातुन छन्।
घटनाको जानकारी पाउनासाथ प्रहरी र सशस्त्र प्रहरी बलका टोली खोजीमा परिचालन भएका थिए। पछि विशेषज्ञ गोताखोर तथा उद्धार टोली पनि खोजीमा सहभागी भएको प्रहरीले जनाएको छ। मंगलबार राति अबेरसम्म जारी खोजी बुधबार बिहान पुनः सुरु भएको थियो।
शव पोस्टमार्टमका लागि अस्पताल पुर्याइयो
प्रहरीका अनुसार बेपत्ता भएको स्थानबाट करिब २.५ किलोमिटर दक्षिणमा दुई शव फेला परेका हुन्। शवलाई पोस्टमार्टमका लागि प्रादेशिक अस्पताल पुर्याइएको छ।
अहिलेसम्म बेपत्ता रहेका रौशन खातुनको खोजी जारी रहेको प्रहरीले बताएको छ।
