मध्यपुर थिमिका एक सेवाग्राहीले जग्गा किन्नका लागि चार दिनसम्म कार्यालय धाउँदा पनि काम नहुँदा निकै हैरानी भोग्नुपरेको छ। डिजिटल प्रणालीको खराबीका कारण सेवा प्रभावित भएको उनको गुनासो छ।
बुधबारदेखि नै कार्यालय पुगेका रमेश पराजुली (नाम परिवर्तित) अघिल्लो दिन सिस्टम नचलेर फर्किएका थिए। बिहीबार बिहानै पुग्दा पनि सेवा सुरु हुन सकेन। उनले भने, 'कार्यालय बन्द हुने समयसम्म बसिरहेँ, दुई घण्टा सर्भर चले पनि काम भएन। शुक्रबार काम हुँदैन, सोमबार मात्र आउनु भन्दै कर्मचारीले पठाए।'
कार्यालयमा सिस्टमको समस्या देखाइए पनि भित्र काम भइरहेको उनले देखेको दाबी गरेका छन्। सरकारको डिजिटल नेपाल अभियानमाथि नै प्रश्न उठाउँदै उनले भने, 'इन्टरनेट नचल्ने, सर्भर बन्द हुने, बत्ती नहुनेजस्ता समस्याले एउटा काम गर्न चार दिन लाग्छ। यस्तो अवस्थामा कार्यालयलाई प्रविधिमैत्री भन्न सकिन्न।'
