दक्षिण कोरियाको राजदूतावास र भाटभाटेनी सुपरमार्केटको सहकार्यमा 'डिस्कभर कोरिया २०२६' नामक दुई हप्ते प्रवर्द्धनात्मक अभियान सुरु भएको छ। शुक्रबार भाटभाटेनी महाराजगञ्ज शाखामा आयोजित एक कार्यक्रममा नेपालका लागि दक्षिण कोरियाली राजदूत पार्क तायोङले अभियानको उद्घाटन गरेका हुन्।
गत जुलाई २२ बाट सुरु भएको यो अभियान भाटभाटेनीका विभिन्न शाखामा सञ्चालन हुँदै आएको छ। अभियानमा कोरियाली उपभोग्य वस्तुहरूको विस्तृत प्रदर्शनी राखिएको छ, जसले नेपालमा कोरियाली जीवनशैली र संस्कृतिप्रति बढ्दो आकर्षणलाई झल्काउँछ।
महाराजगञ्ज शाखामा आयोजित कार्यक्रममा कोरियाली खाना तथा रामेन स्वाद लिने, फोटो जोन, हानबोक (परम्परागत कोरियाली पोशाक) लगाएर फोटो खिच्ने अवसर, र पाँच सहभागी भाटभाटेनी शाखामा एक हजार रुपैयाँभन्दा बढीको खरिद गर्ने ग्राहकका लागि लक्की ड्र राखिएको छ। साथै, सार्वजनिक खाना परिक्षण, लाइभ कुकिङ डेमोन्स्ट्रेसन र नोङ्सिमलगायत प्रमुख कोरियाली ब्रान्डको प्रदर्शनी पनि राखिएको छ।
उक्त कार्यक्रमलाई सम्बोधन गर्दै राजदूत पार्कले भाटभाटेनी सुपरमार्केटसँगको सहकार्यले नेपाली उपभोक्तालाई प्रामाणिक कोरियाली उत्पादनसँग परिचित गराउन तथा दुई देशबीच सांस्कृतिक र व्यापारिक सम्बन्ध थप सुदृढ गर्न सहयोग पुग्ने बताए। आयोजकका अनुसार यो अभियानले अन्तरक्रियात्मक अनुभवमार्फत कोरियाली उत्पादनलाई प्रवर्द्धन गर्न र नेपाली जनतालाई कोरियाली खाना तथा संस्कृतिसँग घुलमिल गराउने लक्ष्य राखेको छ।
