अष्ट्रेलियाको इन्टरनेट नियामकले मेसेन्जिङ एप टेलिग्रामविरुद्ध आतङ्कवादी सामग्री नहटाएको भन्दै कानुनी कारबाही अघि बढाएको छ। इसेफ्टी कमिसनरको कार्यालयले बिहीबार यो कारबाही सुरु गरेको जनाएको छ।
इसेफ्टी कमिसनर जुली इनम्यान ग्रान्टले एक विज्ञप्तिमा भनिन्, “यो मुद्दा हालका वर्षहरूमा भएका केही कुख्यात चरमपन्थी हिंसाका घटनासँग जोडिएको सामग्रीसँग सम्बन्धित छ, जसमा क्राइस्टचर्च र बफेलो आतङ्कवादी आक्रमणको सामग्री समावेश छ।” उनले टेलिग्रामलाई यसबारे जानकारी दिइसक्दा पनि सामग्री प्लेटफर्ममा रहेको आरोप लगाइन्।
नियम र मापदण्डको पालना नगरेको अवस्थामा सिभिल जरिवाना वापत अष्ट्रेलियाली डलर ५४।६ मिलियन (अमेरिकी डलर ३८ मिलियन) सम्म हुन सक्ने नियामकले जनाएको छ।
टेलिग्रामका प्रवक्ताले प्रतिक्रिया दिँदै आरोप अस्वीकार गर्दै अदालतमा प्रतिरक्षा गर्ने बताए। उनले भने, “हामी यी आरोपहरू अस्वीकार गर्दछौं र अदालतमा चुनौती दिनेछौं।” प्रवक्ताका अनुसार टेलिग्रामले आतङ्कवादविरुद्ध आफ्ना प्रयासहरू सार्वजनिक गर्दै आएको छ, जसमा सन् २०२६ मा मात्रै हजारौं चरमपन्थी समुदायलाई ब्लक गरिएको छ।
अदालतमा दायर गरिएको मुद्दामा, इसेफ्टी कमिसनरले अष्ट्रेलियाली टेलिग्राम प्रयोगकर्ताहरूले जुलाई २०२५ देखि अक्टोबर २०२५ सम्म १२ वटा आतङ्कवादी सामग्री भएका पोस्टहरू देखेको उजुरी दिएको उल्लेख छ, जसमध्ये तीनवटा ज्ञात आतङ्कवादी सामग्री थिए। तर टेलिग्रामले तीमध्ये १० वटा पोस्ट हटाउन वा ती पोस्ट गर्ने खाता निलम्बन वा ब्लक गर्न असफल भएको अभियोग छ।
टेलिग्राम विश्वकै सबैभन्दा धेरै डाउनलोड गरिने एपमध्ये एक हो, जसका १ अर्ब मासिक सक्रिय प्रयोगकर्ता रहेको कम्पनीले जनाएको छ। यसका संस्थापक रुसी मूलका पावेल दुरोभले सन् २०१४ मा रुस छाडेर सन् २०१७ मा कम्पनीसहित दुबई सरेका थिए।
युक्रेनमा रुसको युद्धको बारेमा जानकारीको महत्वपूर्ण स्रोत बनेको टेलिग्राम मस्को र किभका अधिकारीहरूले व्यापक रूपमा प्रयोग गर्छन्। यसै साता बुधबार, रुसले दुरोभविरुद्ध आतङ्कवादी गतिविधिलाई सहजीकरण गरेको आरोप लगाएको छ, जसमा एप युक्रेनी जासूसहरूले रुसभित्र आक्रमण आयोजना गर्न प्रयोग गरेको आरोप छ।