दाङको तुलसीपुर उप-महानगरपालिका–४ मा रहेको राप्ती आँखा अस्पतालमा भारत सरकारको सहयोगमा निर्मित अपरेसन थिएटर भवनको बिहीबार उद्घाटन गरिएको छ। भारतीय राजदूतावासका अनुसार उक्त दुईतले भवनले यस क्षेत्रको आँखा उपचार सेवालाई थप सुदृढ बनाउने अपेक्षा गरिएको छ।
संयुक्त उद्घाटन
काठमाडौंस्थित भारतीय राजदूतावासकी काउन्सिलर गितान्जली ब्रान्डन र तुलसीपुर उप-महानगरपालिकाका मेयर टिकाराम खड्काले उक्त भवनको संयुक्त रूपमा उद्घाटन गरेको राजदूतावासले जारी गरेको विज्ञप्तिमा उल्लेख छ।
यो परियोजना तुलसीपुर उप-महानगरपालिकाको कार्यान्वयनमा भारतको हाई इम्प्याक्ट कम्युनिटी डेभलपमेन्ट प्रोजेक्ट (एचआइसीडीपी) कार्यक्रमअन्तर्गत निर्माण गरिएको हो। दाङ जिल्लामा यो सातौँ एचआइसीडीपी परियोजना पूरा भएको बताइएको छ।
आँखा उपचार क्षमता विस्तार
उद्घाटन कार्यक्रममा मेयर, अस्पताल व्यवस्थापन तथा अन्य सरोकारवालाहरूले भारतको विकास सहायताको प्रशंसा गरेका छन्। उनीहरूले नयाँ पूर्वाधारले दाङ र छिमेकी जिल्लाका बासिन्दालाई विशेष आँखा उपचार सेवा उपलब्ध गराउने अस्पतालको क्षमता बढाउने बताएका छन्।
राजदूतावासका अनुसार भारतले सन् २०२२ जनवरीमा राप्ती आँखा अस्पताललाई एम्बुलेन्ससमेत उपलब्ध गराएको थियो। दाङ जिल्लामा हालसम्म १९ एम्बुलेन्स र आठ विद्यालय बस वितरण गरिएको छ।
नेपाल–भारत विकास साझेदारी
कार्यक्रम सुरु भएयता भारतले नेपालका सातै प्रदेशमा करिब ६ सय एचआइसीडीपी परियोजना अघि बढाएको राजदूतावासले जनाएको छ। तीमध्ये ६६ परियोजना लुम्बिनी प्रदेशमा छन्, जसमध्ये सातवटा दाङ जिल्लामा रहेका छन्।
त्यस्तै, भारतले लुम्बिनी प्रदेशभरका स्वास्थ्य तथा शैक्षिक संस्थाहरूलाई १६९ एम्बुलेन्स र ५९ विद्यालय बस उपलब्ध गराएको छ।
एचआइसीडीपीको कार्यान्वयनले स्वास्थ्य र शिक्षाजस्ता प्राथमिकता क्षेत्रको पूर्वाधार विकास तथा सार्वजनिक सेवा सुदृढ बनाउन नेपाल र भारतबीचको निरन्तर सहयोगलाई देखाउने राजदूतावासले विज्ञप्तिमा उल्लेख गरेको छ।