ब्रोड पिकमा बेपत्ता निम्स दाइ : पाकिस्तान प्रस्थानका बेला यो हिमाल चढ्ने योजना थिएन

पाकिस्तानको ८ हजार ४७ मिटर अग्लो ब्रोड पिक हिमाल चढ्न गएका चर्चित आरोही निर्मल पुर्जा (निम्स दाइ) लगायत १० जना सम्पर्कविहीन भएका छन् । सम्पर्कविहीन हुनेमध्ये छ जना नेपाली आरोही रहेको बताइएको छ । उनीहरूको खोजी तथा उद्धार कार्य भइरहेको छ ।

पुर्जाको पछिल्लो सामाजिक सञ्जाल अपडेटले पाकिस्तान प्रस्थान गर्नुअघि ब्रोड पिक चढ्ने योजना नभएको देखाउँछ । उनका अनुसार सुरुमा ‘गेसेरब्रम २’ मात्र आरोहण गर्ने योजना थियो ।

विश्व कीर्तिमानको सम्भावना

पुर्जाको विगतका आरोहण अभिलेख हेर्दा ब्रोड पिकको सफल आरोहण भएको खण्डमा चोयुबाहेक ८ हजार मिटरभन्दा माथिका १४ वटै हिमाल अक्सिजनबिना दुई पटक चढ्ने विश्व कीर्तिमान उनको नाममा दर्ता हुने अवस्था थियो ।

अरू आरोहीसँग आफ्नो कहिल्यै प्रतिस्पर्धा नरहेको पनि पुर्जाले बताएका छन् । फेसबुकमा गरेको स्टाटसमा उनले १४ हिमालको आरोहणका क्रममा भोग्नुपरेका कठिनाइहरू पनि समेटेका छन् ।

आरोहणका बेला प्रार्थना

यस आरोहणका क्रममा पुर्जाले सुरक्षित आरोहण गरेर फर्कने बाटोबाहेक अरू केही नमाग्ने भन्दै प्रार्थना गरेको उनको पोस्टमा उल्लेख छ ।

ब्रोड पिकमा बेपत्ता भएकाहरूको खोजी तथा उद्धारका लागि काम भइरहेको बताइए पनि थप विवरण आउन बाँकी छ ।