बलिउड अभिनेता प्रदीप रावतको निधन, मुम्बईमा आजै अन्त्येष्टि

बलिउड अभिनेता प्रदीप रावतको निधन भएको छ । मुम्बईस्थित कोकिलाबेन धिरुभाइ अम्बानी अस्पतालमा मंगलबार उनले अन्तिम सास लिएका हुन् । रावतकी पत्नी तथा अभिनेत्री कल्याणी र व्यवस्थापक सिद्धार्थ तिवारीले निधनको पुष्टि गरेका छन् ।

रावत ७४ वर्षका थिए र रक्त क्यान्सरबाट पीडित थिए । निधनपछि उनको शव अस्पताल नजिकै रहेको गोरेगाउँस्थित निवासमा लगिएको थियो । पत्नी कल्याणीले ह्वाट्सएप स्टोरीमार्फत् यो खबर सबैभन्दा पहिले सार्वजनिक गरेकी थिइन् ।

अन्तिम संस्कारको तयारी

बुधबार दिउँसो २ देखि ४ बजेसम्म गोरेगाउँस्थित घरमा रावतको पार्थिव शरीरलाई अन्तिम श्रद्धाञ्जलीका लागि राखिने भएको छ । त्यसपछि बेलुका पश्चिम जोगेश्वरीको एसभी रोडस्थित ओसिवारा पुलनजिकैको आर्यघाटमा अन्त्येष्टि गरिने बताइएको छ ।

नयाँ दिल्लीमा रहेकी नेपाली अभिनेत्री विपना थापाले सामाजिक सञ्जालमार्फत् यो खबर थाह पाएको र अन्त्येष्टिमा सहभागी हुन मुम्बई जान लागेको जानकारी दिएकी छन् ।

फिल्म करियर र श्रद्धाञ्जली

रावतले बलिउड फिल्म ‘लगान’ र ‘गजिनी’मा भिलेनको भूमिका निर्वाह गरेका थिए । उनी महाभारत सिरियलमा अस्वस्थामाको भूमिकामा पनि देखिएका थिए । उनले नेपाली फिल्म ‘ह्रस्वदीर्घ’ र ‘आबाट आमा’मा समेत अभिनय गरेका छन् ।

रावतसँग ‘लगान’मा अभिनय गरेका कलाकार यशपाल शर्माले सामाजिक सञ्जालमा श्रद्धाञ्जली व्यक्त गरेका छन् । भारतीय सञ्चारमाध्यमले रावतका व्यवस्थापक र शर्माको पोस्टलाई उल्लेख गर्दै निधनको खबर प्रकाशित गरिरहेका छन् । नेपाली कलाकारहरूले पनि उनको निधनमा श्रद्धाञ्जली दिइरहेका छन् ।