काठमाडौं । निषेधित क्षेत्रमा आवश्यक पदयात्रा अनुमति नलिई विदेशीलाई पदयात्रा गराएको भन्दै अध्यागमन विभागले एक ट्राभल कम्पनीमाथि जरिबाना लगाउनुका साथै चार विदेशी नागरिकलाई पनि कारबाही गरेको छ ।
विभागका अनुसार डोल्पा जिल्लाको निषेधित क्षेत्र मानिने तल्लो डोल्पामा अनुमति नलिई पदयात्रा भएको विषयमा जिल्ला प्रशासन कार्यालय डोल्पाबाट पत्र प्राप्त भएपछि आवश्यक छानबिन गरिएको थियो । सो क्रममा प्रचलित कानुनको पालना नगरी विदेशीलाई निषेधित क्षेत्रमा पदयात्रा गराइएको देखिएको विभागले जनाएको छ ।
छानबिनपछि माउन्ट रोज टुर्स एन्ड ट्राभल्स प्रालिलाई अध्यागमन ऐन २०४९ को दफा १० (४) बमोजिम ५० हजार रुपैयाँ जरिबाना गरिएको विभागले जानकारी दिएको छ ।
त्यस्तै पदयात्रा अनुमति नलिई निषेधित क्षेत्रमा प्रवेश गरेका मेक्सिकोका चार नागरिकलाई जनही १० हजार रुपैयाँका दरले जरिबाना गरिएको छ । उनीहरूबाट पदयात्रा अनुमति लिँदा लाग्ने दस्तुरबापत प्रतिव्यक्ति २० अमेरिकी डलरसमेत असुल गरिएको विभागले उल्लेख गरेको छ ।
अनुमति प्रणाली पालना गर्न आग्रह
निषेधित क्षेत्रमा प्रवेश गर्दा अध्यागमन नियमावली २०५१ को नियम ३२ बमोजिम आवश्यक प्रक्रिया पूरा गरेर पदयात्रा अनुमति लिनुपर्ने व्यवस्था रहेको विभागले स्पष्ट पारेको छ । नेपालको पदयात्रा पर्यटनलाई सुरक्षित, व्यवस्थित र मर्यादित बनाउन पदयात्रासम्बन्धी कानुनी प्रावधान तथा अनुमति प्रणालीको पूर्ण पालना अनिवार्य रहेको पनि विभागको भनाइ छ ।
विदेशी पर्यटक, ट्रेकिङ एजेन्सी तथा सम्बन्धित सरोकारवालालाई निषेधित क्षेत्रमा पदयात्रा गराउँदा अनिवार्य रूपमा अनुमति लिन र प्रचलित कानुनी व्यवस्थाको पूर्ण पालना गर्न विभागले आग्रह गरेको छ ।
