पाकिस्तानले सन् २०३५ सम्म आफ्नो राष्ट्रिय ऊर्जा मिश्रणमा स्वच्छ विद्युत्को हिस्सा ९० प्रतिशत पुर्याउने लक्ष्य लिएको छ। ऊर्जा विभागका मन्त्री सरदार ओवैस अहमद खान लेघारीले मङ्गलबार इस्लामाबादमा आयोजित एक सम्मेलनलाई सम्बोधन गर्दै यो लक्ष्य बताएका हुन्।
उनका अनुसार ऊर्जा सुरक्षा सुदृढ गर्न सरकारले ब्याट्री ऊर्जा भण्डारण प्रणाली (बीइएसएस), स्वदेशी उत्पादन र नियामकीय सुधारमा विशेष ध्यान दिइरहेको छ। आयातित इन्धनमाथिको निर्भरता घटाउने दिशामा पनि सरकारले काम अघि बढाएको मन्त्रीको भनाइ छ।
स्वच्छ स्रोतको हालको अवस्था
मन्त्री लेघारीका अनुसार हाल पाकिस्तानको कुल विद्युत् उत्पादनमा जलविद्युत्, आणविक, वायु र सौर्य ऊर्जालगायत स्वच्छ स्रोतको हिस्सा करिब ५५ प्रतिशत छ। त्यस्तै, उपभोक्ता–नेतृत्वको लगानीमार्फत देशभर करिब ३८ गिगावाट क्षमताका सौर्य ऊर्जा प्रणाली जडान भइसकेको उनले जानकारी दिए।
दिउँसो उत्पादन हुने अतिरिक्त सौर्य ऊर्जालाई विद्युत्को उच्च माग हुने समयमा प्रयोग गर्न तथा आयातित इन्धनको खपत घटाउन बीइएसएस आवश्यक रहेको मन्त्रीले बताए।
भण्डारण प्रणाली विस्तारका योजना
उनका अनुसार प्राथमिकता प्राप्त परियोजना पहिचान गर्न र राष्ट्रिय ऊर्जा भण्डारण नीति तर्जुमा गर्न बीइएसएससम्बन्धी राष्ट्रिय निर्देशक समिति तथा प्राविधिक र नियामकीय कार्यदल गठन गरिनेछ।
सरकारले स्वदेशी ब्याट्री उत्पादनलाई प्रोत्साहन गर्ने नीति अघि बढाइरहेको पनि मन्त्री लेघारीले बताए। वितरण कम्पनीहरूसँगको सहकार्यमा परीक्षणका रूपमा ऊर्जा भण्डारण परियोजना सञ्चालन गर्न स्वीकृति दिइसकिएको उनको भनाइ छ।