बोस्निया र हर्जगोभिनामा युरोपेली सङ्घ (इयु) को शान्ति मिसनअन्तर्गत परिचालित इटालियन सैन्य हेलिकप्टर दुर्घटनामा परेको छ। सो दुर्घटनामा चार सैनिकको मृत्यु भएको छ भने थप ११ जना घाइते भएका छन्। युरोपेली सङ्घीय सेना (इयुफोर) ले सार्वजनिक गरेको विवरणअनुसार अक्टोबर २९ मा ब्रस्को नजिकैको गोरिस क्षेत्रमा नियमित सैन्य अभ्यास चलिरहेका बेला इटालियन चिनुक हेलिकप्टर दुर्घटनाग्रस्त भएको हो।
घाइते भएका ११ जनाको अवस्था स्थिर रहेको र उनीहरूको उपचार जारी रहेको इयुफोरले जनाएको छ। दुर्घटना भएलगत्तै स्थानीय आपत्कालीन चिकित्सा टोली तथा इयुफोरको सम्पर्क तथा अवलोकन टोली घटनास्थल पुगेको थियो। उनीहरूले घाइतेको उद्धार गरी ब्रस्कोस्थित चिकित्सा केन्द्रमा लगेका थिए।
उक्त घटनामा कुनै सर्वसाधारण घाइते नभएको इयुफोरले स्पष्ट पारेको छ। नागरिक पूर्वाधार, सम्पत्ति वा सवारीसाधनमा पनि क्षति नपुगेको मिसनले जनाएको छ। दुर्घटनाको कारण खुट्याउन विस्तृत अनुसन्धान भइरहेको र तथ्य पुष्टि भएपछि थप जानकारी सार्वजनिक गरिने इयुफोरले बताएको छ। साथै अपुष्ट सूचना नफैलाउन तथा दुर्घटनामा संलग्न सैनिकको पहिचान र राष्ट्रियताबारे अनुमान नगर्न मिसनले आग्रह गरेको छ।
प्रधानमन्त्री मेलोनीको समवेदना
इटालीकी प्रधानमन्त्री जोर्जिया मेलोनीले दुर्घटनाप्रति दुःख व्यक्त गरेकी छिन्। सामाजिक सञ्जाल एक्समार्फत उनले मृतकका परिवार तथा घाइतेप्रति समवेदना प्रकट गर्दै इटाली सरकारको तर्फबाट पीडित परिवारप्रति समर्थन र ऐक्यबद्धता जनाएकी छिन्। क्षेत्रीय शान्ति र स्थिरता कायम गर्न खटिएका सबै कर्मचारीप्रति पनि उनले सहानुभूति व्यक्त गरेकी छिन्।
इयुफोर मिसन इटालीको नेतृत्वमा सञ्चालन भइरहेको छ र यसले बोस्निया र हर्जगोभिनामा शान्ति तथा स्थिरता कायम राख्ने काम गर्दै आएको छ। सोही मिसनअन्तर्गत उक्त हेलिकप्टर परिचालन भएको थियो।
