म्यानचेस्टर सिटीका स्पेनिस मिडफिल्डर रोड्री अब आफ्नो देश फर्किने मनस्थितिमा छन्। तर उनले नयाँ क्लबका रूपमा रियल मड्रिडलाई नरोज्ने संकेत गरेका छन्। उनको रोजाइ बार्सिलोना हुनसक्ने बताइन्छ।
रोड्रीको हकमा वार्ता गर्न बार्सिलोनालाई हरियो बत्ती दिइसकिएको छ। यो अनुमतिपछि बार्सिलोना उनलाई अनुबन्ध गर्ने प्रतिस्पर्धामा सबभन्दा अगाडि देखिएको छ।
बार्सिलोनाप्रति आकर्षण
गत एक महिनायता रियल मड्रिडले रोड्रीका प्रतिनिधिसँग छलफल चलाइरहेको थियो। ती वार्ताहरूले कुनै निष्कर्ष ननिकाल्दा रोड्रीको प्राथमिकता बार्सिलोनातिर मोडिएको देखिन्छ।
रोड्रीलाई बार्सिलोनाको खेल्ने तरिकाले प्रभावित पारेको छ। उनले प्रशिक्षक हान्सी फ्लिकसँग कुराकानीसमेत गरिसकेका छन्, जसमा फ्लिकले आफ्नो टिममा उनको भूमिका र प्रयोगका बारेमा बताएको स्रोतले जनाएको छ।
रियलको पछिल्लो कोसिस
रियलका प्रशिक्षक जोसे माउरिन्हो सुरुदेखि नै उनलाई टिममा ल्याउन पूर्णरूपमा सहमत नरहेको रोड्रीको पक्षले महसुस गरेको थियो। त्यसैले पनि रोड्रीले रियलप्रति चासो देखाएनन् भन्ने बुझिन्छ।
तैपनि, रियल मड्रिडले रोड्रीको सम्भावना पूरै त्यागेको छैन। उसले पछिल्लो प्रयास गरेर सम्झौतालाई आफूअनुकूल बनाउन सक्ने आसमा काम गरिरहेको छ।
म्यानचेस्टर सिटीसँग आफ्नो सम्झौता लम्ब्याउनुको साटो रोड्रीले यसै गर्मीयाममा स्पेन फर्कने चाहना राखेका छन्। यस परिस्थितिमा उनको भविष्य बार्सिलोनामा देखिएको छ।
