मुख्य सामग्रीमा जानुहोस्

नेपाल फुटबल लिग सञ्चालनका लागि राखेपको सैद्धान्तिक सहमति, फागुन १ बाट सुरु हुने

राष्ट्रिय खेलकुद परिषद्ले नेपाल फुटबल लिग सञ्चालन गर्न स्वीकृतिको सैद्धान्तिक सहमति दिएको एनएफएलले जनाएको छ । लिगको पहिलो संस्करण फागुन १ गतेदेखि सुरु हुने घोषणा भइसकेको छ र त्यसमा १० क्लबले प्रतिस्पर्धा गर्नेछन् ।

विश्वपत्र संवाददाता

· १ मिनेटको पढाइ

१पटक हेरिएको०टिप्पणी०शेयर
स्रोत:Online Khabar
नेपाल फुटबल लिग सञ्चालनका लागि राखेपको सैद्धान्तिक सहमति, फागुन १ बाट सुरु हुने
Online Khabar

आगामी फागुन १ गतेदेखि आयोजना गर्ने भनिएको नेपाल फुटबल लिग (एनएफएल) सञ्चालन गर्न राष्ट्रिय खेलकुद परिषद् (राखेप) ले स्वीकृतिको सैद्धान्तिक सहमति दिएको छ । एनएफएलका अध्यक्ष कल्याण गुरुङले सोमबार प्रेस विज्ञप्ति जारी गर्दै परिषद्ले प्रतियोगिता सञ्चालनका लागि यस्तो सहमति दिएको जानकारी गराएका हुन् ।

नेपाली फुटबललाई व्यावसायिक बाटोमा अघि बढाउने उद्देश्यसहित एनएफएलको पहिलो संस्करण फागुन १ गतेदेखि गर्ने घोषणा पहिले नै भइसकेको छ । विज्ञप्तिअनुसार पहिलो संस्करणमा घरेलु फुटबलका ७ पुराना र ३ नयाँ गरी जम्मा १० क्लबले भाग लिनेछन् ।

यी हुन् सहभागी हुने पुराना क्लब

प्रतियोगितामा सहभागी हुने पक्का भएका पुराना क्लब यी हुन् :

  • काठमाडौं रेजर्स फुटबल क्लब

  • ललितपुर सिटी फुटबल क्लब

  • एफसी चितवन

  • पोखरा थन्डर्स

  • बुटवल लुम्बिनी फुटबल क्लब

  • धनगढी एफसी

  • झापा एफसी

  • यीबाहेक थप तीन नयाँ क्लब समावेश गर्न एनएफएलले प्रक्रिया अघि बढाएको छ । सोही क्रममा विराटनगर, धरान, जनकपुर, वीरगञ्ज, हेटौंडा, भक्तपुर, नेपालगञ्ज र सुर्खेतलगायत सहरको प्रतिनिधित्व गर्ने क्लब स्थापनाका लागि लिगले बोलपत्र आह्वान गरेको थियो ।

    बोलपत्र बुझाउने म्याद मंसिर ४ सम्म

    नयाँ क्लबका लागि बोलपत्र पेस गर्ने अन्तिम मिति पहिले १६ नोभेम्बर २०२६ अर्थात् ३० कात्तिक २०८३ तोकिएको थियो । तर, चाडपर्वको बिदालाई ध्यान दिँदै इच्छुक पक्षलाई तयारीका लागि थप समय दिने निर्णय गरिएको र अन्तिम म्याद मंसिर ४ अर्थात् नोभेम्बर २०, २०२६ सम्म पुर्‍याइएको एनएफएलले जनाएको छ ।

    ‘यो समयसीमा शुक्रबार सकिँदै छ । अहिले हामी यसैको तयारीमा छौं,’ एनएफएलका अध्यक्ष कल्याण गुरुङले भने ।

    नयाँ क्लबका लागि आवेदन दिन चाहने पक्षले आफ्नो व्यावसायिक तथा वित्तीय इतिहास, आगामी १० वर्षको क्लब सञ्चालन योजना र सामाजिक विश्वसनीयतासम्बन्धी विवरण पेस गर्नुपर्नेछ । रंगशालाको उपलब्धतालाई आधार मानेर लिग ‘होम एन्ड अवे’ प्रणालीमा सञ्चालन गर्ने योजना रहेको आयोजकले जनाएको छ । तयारी अवधिसहित एनएफएल करिब चार महिनासम्म चल्ने बताइएको छ ।