प्रतिनिधिसभा सदस्य हर्कराज राईले नेपालमा अहिले नागरिक सुरक्षाको प्रत्याभूति नभएको बताएका छन्। संसद बैठकमा बोल्दै उनले सांसददेखि सर्वसाधारणसम्म सबै असुरक्षित रहेको र जुनसुकै बेला जे पनि हुन सक्ने अवस्था रहेको टिप्पणी गरे।
उनका अनुसार राज्यको पहिलो कर्तव्य नागरिकलाई सुरक्षा दिनु हो, तर त्यो जिम्मेवारी पूरा हुन सकेको छैन। “देशलाई देशजस्तो बनाइराख्न जे गर्नुपर्छ, त्यसका लागि म र मेरो दल तयार छ,” उनले भने।
देशको समग्र अवस्थाप्रति गम्भीर हुनुपर्ने भन्दै उनले सरकारले सुरक्षा, न्याय, सेवा–सुविधा र अवसरको अनुभूति नागरिकलाई गराउन नसकेको बताए।
प्रधानमन्त्रीको अभिव्यक्तिबारे टिप्पणी
सांसद राईले प्रधानमन्त्रीको भारतीय सीमा अतिक्रमणबारेको अभिव्यक्तिलाई लिएर यस्तो भनाइ राखेका हुन्। प्रधानमन्त्रीले नेपालले पनि भारतको सीमा मिचेको भन्ने बताएपछि उनले यी कुरा संसद्मा राखेको बताइएको छ।
नैतिकता र पदीय जिम्मेवारी
नैतिकता नै राजनीतिको बल, शक्ति र वैधानिकता भएको उनको भनाइ छ। जनप्रतिनिधिले नैतिकता गुमाएमा जनताले विश्वास नगर्ने भन्दै उनले प्रधानमन्त्रीलाई नैतिक तथा पदीय जिम्मेवारी निर्वाह गर्न आग्रह गरे।
लामो समयदेखि प्रधानमन्त्रीलाई संसद्मा उपस्थित हुन भनिए पनि नआएको उल्लेख गर्दै उनले यसलाई अडानका रूपमा लिन नहुने बताए। प्रधानमन्त्री संसद् बैठकमा नियमित उपस्थित हुनुपर्ने उनको भनाइ छ।
