पाकिस्तानको ब्रोड पिकमा गत जुलाई ३० मा आएको हिमपहिरोमा परी ज्यान गुमाएका तीन नेपाली आरोहीको पार्थिव शरीर मङ्गलबार काठमाडौं ल्याइएको छ। किली पेम्बा शेर्पा (किलु), निमा शेर्पा र ग्याल्जेन शेर्पा (ग्यालु)को पार्थिव शरीर त्रिभुवन अन्तर्राष्ट्रिय विमानस्थल (टिआईए) ल्याइएको हो।
हिमपहिरोमा ज्यान गुमाएका आरोही
तीनै जना नेपाली पर्वतारोहण क्षेत्रका अनुभवी उच्च हिमाली आरोही थिए। किलुले विश्वका आठ हजार मिटरभन्दा अग्ला १४ वटै हिमालको सफल आरोहण गरेका थिए। त्यस्तै ग्यालुले एकै सिजनमा कञ्चनजङ्घा हिमाल तीन पटक आरोहण गरी गिनिज वर्ल्ड रेकर्ड कायम गरेका थिए। निमा भने उच्च हिमालका दक्ष पेशेवर र नेपालका वरिष्ठ आरोहण गाइड मध्ये एक थिए।
हिमपहिरोमा परी ज्यान गुमाउनेमा यी तीनसहित कुल १० आरोही रहेका छन्। यसअघि गत साता अर्का नेपाली आरोही पुर बहादुर गुरुङ (युक्ता)को पार्थिव शरीर काठमाडौं ल्याइसकिएको थियो। तर, नवाङ थेन्डु शेर्पाको पार्थिव शरीर भने हालसम्म फेला पार्न नसकिएको अवस्था छ।
विमानस्थलमा श्रद्धाञ्जलि
पार्थिव शरीर काठमाडौं आइपुगेपछि त्रिभुवन अन्तर्राष्ट्रिय विमानस्थलमा शोकाकुल परिवारका सदस्य र पर्वतारोहण समुदायका मानिसहरू भेला भएका थिए। उनीहरूले दिवङ्गत आरोहीहरूप्रति अन्तिम श्रद्धाञ्जलि व्यक्त गरेका छन्।
