ग्लोबल आईएमई बैंकले नाइमा नेपाल मोबिलिटी एक्स्पोका क्रममा सवारी खरिद गर्ने ग्राहकलाई लक्षित गर्दै विशेष अटो लोन योजना सार्वजनिक गरेको छ। उक्त योजनाअन्तर्गत बैंकले ५.२५ प्रतिशतदेखिको ब्याजदरमा कर्जा उपलब्ध गराउने जनाएको छ।
विशेष अटो लोन योजना
योजनाअनुसार एक्स्पोमा नयाँ सवारी खरिद गर्ने ग्राहकले बैंकको आधार दरमा न्यूनतम ०.५ प्रतिशत अंक प्रिमियम थपेर अटो लोन पाउनेछन्। बैंकको हालको आधार दरका आधारमा न्यूनतम लागू हुने ब्याजदर ५.२५ प्रतिशत कायम हुने बैंकले बताएको छ। बैंकको आधार दरमा आएको परिवर्तनसँगै यो ब्याजदर स्वतः समायोजन हुने पनि जानकारी दिइएको छ।
विद्युतीय सवारीको कर्जा
नयाँ विद्युतीय सवारी खरिद गर्ने ग्राहकका लागि भने बैंकले तीन वर्षसम्म ५.९९ प्रतिशतको स्थिर ब्याजदर ल्याएको छ। तीन वर्षपछि भने कर्जामा बैंकको आधार दरमा बढीमा दुई प्रतिशत अंक प्रिमियम थपेर ब्याजदर कायम गरिनेछ।
आवेदन प्रक्रिया र बैंक पहुँच
बैंकले नाइमा नेपाल मोबिलिटी एक्स्पोमा आफ्नो स्टलसमेत राखेको छ, जहाँबाट इच्छुक सवारी खरिदकर्ताले कर्जाका लागि आवेदन दिन र प्रारम्भिक प्रक्रिया पूरा गर्न सक्नेछन्। आवश्यक कागजात पेस गरेको बढीमा तीन दिनभित्र कर्जा स्वीकृत हुने बैंकले जनाएको छ।
ग्लोबल आईएमई बैंकले हाल ३४१ शाखा, ३६६ एटिएम, १४७ शाखारहित बैंकिङ आउटलेट र ६९ विस्तार तथा राजस्व संकलन काउन्टर सञ्चालन गर्दै आएको छ। यसका साथै विदेशमा तीन प्रतिनिधि कार्यालयसमेत रहेका छन्।
