काठमाडौं, २९ साउन । त्रिवि शिक्षण अस्पताल महाराजगञ्जको आकस्मिक कक्ष बाहिर उपचारका लागि ल्याइएका एक बिरामीको ज्यान गएको छ । मोरङका ४५ वर्षीय डोलबहादुर थापाको शुक्रबार आकस्मिक कक्ष बाहिरै एम्बुलेन्समा मृत्यु भएको हो ।
थापा नियमित डायलिसिस गराइरहेका बिरामी थिए । स्ट्रोकको समस्या देखिएपछि थप उपचारका लागि उनलाई टिचिङ अस्पताल ल्याइएको बुझिएको छ । अस्पतालका अनुसार बिरामीका आफन्त आकस्मिक कक्षको रेड एरियासम्म पुगेका थिए । त्यतिबेला आकस्मिक कक्षमा बेड खाली नभएकाले चिकित्सकले बेड व्यवस्थापन गर्न केही समय दिन आग्रह गरेका थिए । तर आफन्तहरूले बिरामीलाई अर्को अस्पताल लैजाने बताएका थिए ।
केएमसी लैजाने क्रममा एम्बुलेन्समै मृत्यु
अस्पतालका प्रवक्ता डा. गोपाल सेढाईंले आकस्मिक कक्षमा बेड खाली नभएको र चिकित्सकले व्यवस्थापनका लागि समय मागेको जानकारी दिए । आफन्तले भने बिरामीलाई केएमसी लैजाने बताएका थिए । उनले भने, ‘आकस्मिक कक्षमा बेड खाली नहुँदा चिकित्सकले केही समय कुर्न आग्रह गर्नुभएको थियो, तर आफन्तले केएमसी लैजान्छौं भन्नुभयो ।’
त्यसपछि बिरामीलाई एम्बुलेन्ससम्म लगिएको र करिब १०–१५ मिनेटको अवधिमा उनको अवस्था गम्भीर हुँदै मृत्यु भएको अस्पतालको भनाइ छ । बिरामीलाई आकस्मिक कक्षभित्र ल्याएर चिकित्सकीय परीक्षण गर्नसमेत नपाइएको प्रशासनले जनाएको छ ।
अस्पतालको भनाइ र आफन्तको आक्रोश
एम्बुलेन्समै बिरामीको मृत्यु भएपछि शव आकस्मिक कक्षभित्र ल्याएर जाँच गर्न आग्रह गरिए पनि त्यो प्रक्रिया अघि बढ्न नसकेको प्रवक्ता सेढाईंले बताए । ‘हामीले शव इमरजेन्सीभित्र ल्याएर जीवित वा मृत भन्ने यकिन गर्न खोजेका थियौं, तर सम्भव भएन,’ उनले भने ।
हाल आकस्मिक कक्षमा बिरामीको चाप अत्यधिक रहेको अस्पतालले जनाएको छ । रेड एरिया र येलो एरिया दुवै भरिभराउ हुँदा नयाँ बिरामीलाई तत्काल राख्ने ठाउँको अभाव हुने गरेको प्रवक्ताको भनाइ छ । ‘बेड व्यवस्थापन गर्न सक्ने अवस्था आउँदै गर्दा बिरामीको ज्यान गयो,’ उनले भने ।
मृत्युपछि आफन्तले बेड अभावकै कारण बिरामीको ज्यान गएको भन्दै अस्पताल परिसरमा नाराबाजी गरेका छन् । अस्पताल प्रशासनले घटनाको थप विवरण बुझिरहेको जनाएको छ ।
