फिल्म ‘महाजात्रा’को कार्बन उत्सर्जन कटौती वाचा पूरा गर्न अभिनेता हरिवंश आचार्यले पुर्ख्यौली थलो काभ्रेमा वृक्षारोपण थालेका छन् । उनले केही दिनअघि धुलिखेल वडा १२ मा पर्ने शंखुस्थित जग्गामा ५० वटा टिमुरका बोट रोपेका हुन् ।
सोही स्थानमा अब एभोकाडोका विरुवा रोप्ने तयारी पनि हरिवंशको छ । विरुवा रोप्नुको कारणबारे उनले भने, “टिमुरको बोटमा काँडा हुने भएकाले यसले बारको काम पनि गर्छ । यो नगदेबाली पनि भएकाले रोपेको हुँ ।”
हरिवंशले त्यहाँ कुल २०० विरुवा रोप्ने वाचा पहिले नै गरेका थिए । वाचाअनुसार पहिलो चरणमा टिमुर रोपिएको छ भने अर्को चरणमा एभोकाडो रोप्ने उनको योजना छ ।
यसअघि फिल्म ‘महाजात्रा’का निर्माताले कार्बन तटस्थ पहलअनुसार फिल्मको छायांकन गरिएको जानकारी दिएका थिए । छायांकनका क्रममा केही कार्बन उत्सर्जन हुने भएपछि त्यसलाई सन्तुलन गर्न हरिवंशले विरुवा रोप्ने प्रतिबद्धता जनाएका थिए ।
