युवा, श्रम तथा रोजगारमन्त्री रामजी यादवले प्रतिनिधि सभामा विचाराधीन बालश्रमसम्बन्धी विधेयकमा कुनै पनि विरोधाभास नरहेको स्पष्ट पारेका छन्। भदौ ३ गते बसेको प्रतिनिधि सभा बैठकमा ‘बालश्रम (निषेध तथा नियमित गर्ने) विधेयक, २०८३’ माथि विचार गरियोस् भन्ने प्रस्तावमाथि सांसदहरूले राखेका जिज्ञासाको जवाफ दिँदै उनले यस्तो बताएका हुन्।
मन्त्री यादवले विधेयकका प्रावधानबारे प्रस्ट पार्दै जोखिमयुक्त र शोषणमूलक कामलाई पूर्ण रूपमा निषेध गरिएको जानकारी दिए। बालबालिकाको विकासमा नकारात्मक असर नपुग्ने सुरक्षित प्रकृतिका कामलाई मात्र नियमन गर्ने व्यवस्था विधेयकमा समेटिएको उनले बताए। यो अभ्यास विश्वव्यापी मान्यतामा आधारित भएको पनि उनको भनाइ छ।
“विधेयकमा कुनै विरोधाभास छैन। जोखिमयुक्त र शोषणमूलक काम पूर्ण रूपमा निषेध गरिएको छ। बालबालिकालाई नकारात्मक असर नपुर्याउने सुरक्षित काम मात्र नियमन गरिएको हो,” उनले भने।
प्रस्तावित विधेयकमा १३ वर्ष उमेर पूरा भएका बालबालिकाले कडा सर्तको अधीनमा रहेर विद्यालय समयअघि र पछिको समयमा सामान्य काम गर्न पाउने व्यवस्था छ। बालबालिकाको पढाइ र स्वास्थ्यमा असर नपर्ने गरी मात्र त्यस्तो काम गर्न दिइने मन्त्री यादवको भनाइ छ।
विधेयक सभामा पेस भइसकेकाले अब यससम्बन्धी संशोधन प्रस्ताव दर्ता गराउने प्रक्रिया पनि खुला भएको छ।
