पोखरामा आगामी सेप्टेम्बर १९ गते आयोजना हुने 'राइट टु प्रोटिन रन २०२६' मा चार हजारभन्दा बढी धावक सहभागी हुने भएका छन्। नेपाल फिड इन्डस्ट्रीज एसोसिएसन (एनएफआईए) ले आयोजना गर्ने यो दौडको मुख्य प्रायोजक युएस सोयबिन एक्सपोर्ट काउन्सिल (युएसएसईसी) रहेको छ भने नेपाल एथलेटिक्स संघ प्राविधिक साझेदारको रूपमा रहनेछ।
आयोजनाको मुख्य उद्देश्य प्रोटिनबारे सचेतना, पोषण, शारीरिक फिटनेस र स्वस्थ जीवनशैलीको प्रवर्द्धन गर्नु रहेको आयोजकहरूले बताएका छन्।
दौडमा पुरुष तथा महिला आधा म्याराथन, खुला दौड, विद्यालयस्तरीय युवा दौड र ह्वीलचेयर दौड गरी आठ विधा समेटिनेछन्। २१ किलोमिटर लामो आधा म्याराथनको पुरुष र महिला विधाका विजेताले जनही रु १ लाख ५० हजार पुरस्कार पाउनेछन्। प्रत्येक विधाका शीर्ष पाँच धावकलाई पुरस्कारस्वरूप जम्मा रु १२ लाख ८० हजार वितरण गरिनेछ। आयोजकले २५ प्रतिशत कर समेत व्यहोर्ने भएकाले कुल पुरस्कार राशि रु १६ लाख पुग्नेछ।
दौडको सुरुवात र समापन लेकसाइडस्थित बसुन्धारा पार्कमा हुनेछ। दौडको मार्ग हल्लान चोक, खहरे, सेदी, खपौदी र पामे हुँदै लौरुकसम्म पुग्नेछ र त्यही मार्ग हुँदै सुरुवात बिन्दुमा फर्किनेछ।
सन् २०१९ देखि निरन्तर हुँदै आएको यो दौडले पोषणबारेको छलफललाई सम्मेलनबाट बाहिर निकालेर समुदायसम्म पुर्याउने लक्ष्य लिएको आयोजकहरूले बताए। सन् २०२६ को संस्करणले अण्डा, कुखुराको मासु, माछा, दूध, सोया, टोफु, पनीर, दाल र फलफूलजस्ता सर्वसुलभ प्रोटिन स्रोतबारे सचेतना फैलाउनेछ।
दौडको मार्गमा पानी तथा हाइड्रेसन स्टेसन, प्राथमिक उपचार र स्वास्थ्य सेवाको व्यवस्था गरिनेछ। आकस्मिक स्वास्थ्य सेवाका लागि एम्बुलेन्स पनि उपलब्ध रहनेछ।
एनएफआईएले यो कार्यक्रमले पोखरालाई खेल तथा स्वास्थ्य पर्यटनको गन्तव्यका रूपमा प्रवर्द्धन गर्न, उदीयमान धावकहरूलाई अवसर प्रदान गर्न र पोषण, शारीरिक सक्रियता तथा दीर्घकालीन स्वास्थ्यबीचको सम्बन्धबारे जनचेतना विस्तार गर्न सहयोग पुग्ने विश्वास लिएको छ।
