उदयपुरको बेलका नगरपालिका–५ मा अटोरिक्सा र विद्यालय बस आपसमा ठोक्किँदा दुई महिलाको मृत्यु भएको छ। दुर्घटनामा अटो चालकसहित तीन जना घाइते भएका छन्।
सोमबार बिहान करिब ९ः४५ बजे सुपाडेबाट लालबजारतर्फ जाँदै गरेको अटोरिक्सा (को प्र ०५–००१ ह ०६१३) र विपरीत दिशाबाट आउँदै गरेको सफल आदर्श इङ्लिस बोर्डिङ स्कूलको बस (को १ ख ३५१६) बीच ठक्कर लागेको प्रहरीले जनाएको छ।
दुर्घटनामा बेलका–५ माइनीकी ३४ वर्षीया मन्दिरा मगरको मृत्यु भएको छ। अटोमा सवार अर्की महिलाको पहिचान भने खुल्न सकेको छैन। दुवै महिलालाई धरानस्थित विपी कोइराला स्वास्थ्य विज्ञान प्रतिष्ठान, घोपामा लगिएको थियो। त्यहाँ उपचारका क्रममा राति करिब ११ः४५ बजे उनीहरूलाई मृत घोषणा गरिएको प्रहरीले बताएको छ।
घाइतेहरूमा बेलका–५ कै २८ वर्षीय अटो चालक इन्द्र थापा मगर र १८ वर्षीय रोशन मगर गम्भीर अवस्थामा छन्। त्यस्तै बिराटनगर महानगरपालिका–१२ का १९ वर्षीय अजित गुरुङको अवस्था भने मध्यम रहेको बताइएको छ।
रामपुर थोक्सिला प्रहरी कार्यालय र लालबजार प्रहरी चौकीका टोलीले घाइतेहरूको उद्धार गरी स्थानीय अस्पताल पुर्याएको थियो। त्यहाँबाट उनीहरूलाई थप उपचारका लागि घोपा अस्पताल पठाइएको हो।
दुर्घटनापछि अटोलाई लालबजार प्रहरी चौकीको नियन्त्रणमा राखिएको छ। बस र बेलका–५ का बस चालक ३६ वर्षीय विक्रम थापालाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
