नेपालकै सबैभन्दा ठूलो अटोमोबाइल प्रदर्शनीका रूपमा चिनिने एनएडीए अटो शोले यसपटक सवारी मात्र होइन, प्रविधि, कृत्रिम बुद्धिमत्ता (एआई), रोबोटिक्स र स्वदेशी उत्पादनलाई पनि केन्द्रमा राख्ने भएको छ। आगामी सेप्टेम्बर ९ देखि १४ सम्म भृकुटीमण्डपमा आयोजना हुने १८औं एनएडीए अटो शो २०२६ मा ३ लाख वर्ग फिट क्षेत्रफलभरि २०० भन्दा बढी स्टल रहनेछन्।
प्रदर्शनीमा अटोमोबाइल ब्रान्ड, पार्टपुर्जा उत्पादक, वित्तीय संस्था तथा बीमा कम्पनीहरूको सहभागिता रहनेछ। आयोजकका अनुसार २३ यात्रुवाहक कार ब्रान्ड, १७ हल्का व्यावसायिक सवारी ब्रान्ड र १३ दुईपाङ्ग्रे ब्रान्ड प्रदर्शनीमा देख्न सकिनेछ। यसैगरी पार्टपुर्जा तथा उत्पादनका ७० स्टल र वित्तीय संस्था तथा बीमाका १० स्टल पनि रहनेछन्।
नयाँ सवारी प्रदर्शनमा मात्र यो आयोजना सीमित नरहने आयोजकले बताएका छन्। प्रदर्शनीमा जीआई ह्युमानोइड र जीओ-२ क्वाड्रुपेड रोबोटको प्रत्यक्ष प्रदर्शन गरिनेछ। साथै, प्रदर्शनीमा राखिने सवारीसाधनमा क्युआर कोड जडान गरिनेछ, जसबाट आगन्तुकले एआईमा आधारित डिजिटल जानकारी प्राप्त गर्न सक्नेछन्।
एनएडीए महासचिव मिलन बाबु मल्लले अटोमोबाइल क्षेत्र ठूलो रूपान्तरणबाट गुज्रिरहेको बताए। विद्युतीय सवारीतर्फको संक्रमणसँगै एआई, कनेक्टिभिटी र स्वचालनको प्रयोग बढिरहेको उनको भनाइ छ।
“अटोमोबाइल अब सवारीसाधन मात्र रहेनन्। प्रविधि, गतिशीलता, रोजगारी, वित्तीय सेवा र उद्योगसँग जोडिएको ठूलो इकोसिस्टमको हिस्सा हुन्,” उनले भने।
यसपटक पहिलो पटक ‘मेड इन नेपाल एन्ड मेड फर नेपाल’ प्याभिलियन राखिने भएको छ। उक्त प्याभिलियनमा स्वदेशमै उत्पादन वा एसेम्बल गरिएका मोटरसाइकल, स्कुटर, टायर, लुब्रिकेन्ट, ब्याट्री, हेल्मेट र पार्टपुर्जा प्रदर्शन गरिनेछ। नेपालमा उत्पादन सम्भव छैन भन्ने बुझाइलाई चुनौती दिन यो पहल गरिएको मल्लले बताए।
प्रदर्शनीमा विद्युतीय सवारीको उल्लेख्य उपस्थिति रहनेछ र विभिन्न ब्रान्डले नयाँ इलेक्ट्रिक मोडल सार्वजनिक गर्ने तयारी गरेका छन्। स्मार्ट मोबिलिटी, दिगो यातायात र कनेक्टिभिटी विषयमा छलफल पनि आयोजना गरिनेछ। मल्लले विद्युतीय सवारीको वृद्धिसँगै चार्जिङ पूर्वाधार, दक्ष जनशक्ति, सेवा सञ्जाल र नीतिगत स्थायित्वमा लगानी आवश्यक रहेकोमा जोड दिए।
छ दिनसम्म चल्ने प्रदर्शनीमा आयोजकले २ लाख आगन्तुक आउने अपेक्षा गरेको छ। भृकुटीमण्डप वरपर धेरै स्थानमा पार्किङको व्यवस्था गरिनेछ भने प्रदर्शनीस्थलसम्म निःशुल्क शटल बस सञ्चालन गरिनेछ। साइटमा सिसिटिभी निगरानी, व्हीलचेयर सुविधा, आपत्कालीन स्वास्थ्य टोली र ट्राफिक डेस्क रहनेछन्। खल्तीमार्फत अग्रिम टिकट लिने आगन्तुकले ५० प्रतिशतसम्म क्यासब्याक पाउने व्यवस्था गरिएको छ।
एनएडीएको स्वर्ण जयन्ती वर्षमा हुन लागेको १८औं संस्करणलाई सवारी प्रदर्शनीका रूपमा मात्र नभई नेपालको अटोमोबाइल उद्योग र गतिशीलता प्रणालीको भविष्यबारे बहस गर्ने मञ्चका रूपमा हेरिएको छ।
