काठमाडौं, ७ भदौ । नेपाली कांग्रेसका नेता विमलेन्द्र निधिले संघीय लोकतान्त्रिक गणतन्त्रात्मक प्रणाली र संविधानको सुरक्षामा व्यवसायीहरूको सक्रिय सहभागिता आवश्यक रहेको बताएका छन् । जनकपुरधाम सुनचाँदी व्यवसायी संघको नवनिर्वाचित पदाधिकारीहरूको पद हस्तान्तरण कार्यक्रममा बोल्दै उनले यस्तो धारणा राखेका हुन् ।
निधिले संविधानसभाका दुई निर्वाचन र जनताको लामो संघर्षपछि निर्माण भएको संघीय संरचना र संविधानमाथि अहिले चौतर्फी प्रहार भइरहेको भन्दै चिन्ता प्रकट गरे । राजनीतिक प्रणाली धरापमा पर्दा त्यसको सोझो असर व्यवसायमा पर्ने भएकाले व्यवसायीहरू राजनीतिप्रति सजग हुनुपर्ने उनले बताए । सात प्रदेश, ७५३ स्थानीय तह र ६ हजार ७४३ वडासहितको संरचना कार्यान्वयन गर्नु आजको आवश्यकता भए पनि दलहरूको आन्तरिक द्वन्द्व र अन्य कारणले संघीयता, लोकतन्त्र र समावेशितामाथि जोखिम बढेको उनको भनाइ छ । नेता तथा दलहरूको मात्र जिम्मेवारी नभई व्यवसायीको समेत प्रत्यक्ष सरोकार रहेकाले प्रणाली बचाउन सबै एकजुट हुनुपर्ने उनले आग्रह गरे ।
सुनचाँदी व्यवसाय क्षेत्रका समस्या समेट्दै निधिले सरकारको ध्यान तान्ने प्रयास गरे । सरकारी निकायले सुनचाँदी व्यवसायीलाई कालोबजारी गर्ने समूहका रूपमा हेर्ने प्रवृत्तिको उनले आलोचना गरे र त्यो सोच तत्काल बदल्नुपर्ने बताए ।
उनले व्यवसायीले निर्भय भई व्यापार गर्न सक्ने वातावरण तयार पार्न सहज, सुरक्षित र मर्यादित कानुन निर्माण गर्नुपर्ने माग राखे । व्यवसायीले ग्राहकबाट फिर्ता लिएको वा खरिद गरेको सुन बैंकले खरिद गरिदिने व्यवस्था हुनुपर्ने र सुनचाँदी व्यवसायीको सामाजिक मर्यादा जोगाउन नकारात्मक दृष्टिकोणको अन्त्य गर्नुपर्ने उनले सुझाव दिए ।
