काठमाडौं, अगस्ट २३। दक्षिण एसियाली खेलकुदको १४औँ संस्करण सन् २०२७ अप्रिल ३ देखि ११ सम्म पाकिस्तानमा आयोजना हुने भएको छ। नेपाल ओलम्पिक कमिटी (एनओसी) ले यो जानकारी दिएको हो।
इस्लामाबादमा बसेको साउथ एसिया ओलम्पिक काउन्सिल (एसएओसी) को कार्यकारी समिति बैठकले प्रतियोगिताको मिति र खेल कार्यक्रम अन्तिम रूप दिएको हो। बैठकको निर्णयअनुसार बंगलादेश, भुटान, भारत, माल्दिभ्स, नेपाल, पाकिस्तान र श्रीलंकाका खेलाडीले प्रतिस्पर्धा गर्नेछन्।
प्रतियोगितामा २८ खेल समावेश छन्। एथलेटिक्स, पौडी, तीरंदाजी, ब्याडमिन्टन, बास्केटबल (३x३ र ५x५), बिलियर्ड्स तथा स्नुकर, बक्सिङ, क्रिकेट, फेन्सिङ, फुटबल, गल्फ, ह्यान्डबल तथा बिच ह्यान्डबल, जुडो, हक्की, कबड्डी, कराते, रोइङ, रग्बी, सुटिङ, स्क्वास, टेबल टेनिस, तेक्वान्दो, टेनिस, ट्राइयाथलन, भलिबल तथा बिच भलिबल, भारोत्तोलन, कुस्ती र उशु समावेश रहेका छन्।
एसएओसी बैठकमा नेपालको प्रतिनिधिमण्डलमा एनओसी अध्यक्ष जीवनराम श्रेष्ठ, उपाध्यक्ष चतुरानन्द राज वैद्य, राष्ट्रिय खेलकुद परिषद्का सदस्य तथा स्टेयरिङ कमिटी सदस्य सिक्का सुवाल श्रेष्ठ सहभागी थिए।
यसपटक प्रतियोगिताको मूल विषय “दक्षिण एसियामा एकता, खेलकुदमा शक्ति” रहेको छ भने नारा “एक आत्मा, एक क्षेत्र, एक दृष्टि” तय गरिएको छ।
