प्रविधि कम्पनी एप्पलले मंगलबार एआई डेभलपरहरूलाई लक्षित गर्दै आफ्ना नयाँ डेस्कटप मोडलहरू — म्याक मिनी र म्याक स्टुडियो — अनावरण गरेको छ। नयाँ मोडलहरूमा एम सिक्स, एम फाइभ प्रो, एम फाइभ म्याक्स र एम फाइभ अल्ट्रा गरी चार प्रकारका चिप प्रयोग गरिएको कम्पनीले जनाएको छ।
नयाँ म्याक मिनीमा भने एम सिक्स अथवा एम फाइभ प्रो चिप सुसज्जित छ। एम सिक्स भेरियन्टमा ३२ जिबीसम्म र एम फाइभ प्रो भेरियन्टमा ६४ जिबीसम्म मेमोरी कन्फिगर गर्न सकिन्छ। यस्तै, म्याक स्टुडियोमा एम फाइभ म्याक्स र नयाँ एम फाइभ अल्ट्रा प्रोसेसर राखिएका छन्। कम्पनीले दुवै प्रणालीको एआई कार्यसम्पादन, गेमिङ र भिडियो सम्पादन क्षमतामा उल्लेख्य सुधार भएको दाबी गरेको छ।
विश्वव्यापी रूपमा एआई प्रविधिका कारण मेमोरी र स्टोरेजको अभाव सिर्जना भएपछि एप्पलले म्याक मिनीको मूल्य भने बढाएको छ। नयाँ म्याक मिनीको सुरुवाती मूल्य ८९९ अमेरिकी डलर राखिएको छ, जुन अघिल्लो मोडलको ७९९ डलरभन्दा १०० डलर बढी हो। एम फाइभ प्रो चिप भएको म्याक मिनी १,६९९ डलरबाट सुरु हुन्छ। म्याक स्टुडियोको बेस मोडल २,४९९ डलरमै कायम रहेको छ भने एम फाइभ अल्ट्रा भेरियन्ट ५,४९९ डलर पर्नेछ।
हाल म्याक मिनी र म्याक स्टुडियो एआई इन्जिनियरहरूबीच लोकप्रिय बन्दै गएका छन्। सानो आकार, तुलनात्मक रूपमा कम मूल्य र डिस्प्ले नचाहिने हुनुका कारण डेभलपरहरूले यी मेसिन रोज्ने गरेका छन्। यी मेसिनमा एआई एजेन्ट चलाएर स्मार्टफोन वा ल्यापटपबाटै पहुँच बनाउन सकिने व्यवस्था रहेको छ।
कम्पनीका अनुसार बेस म्याक मिनी अर्डर गरेको खण्डमा एक महिनाभन्दा बढी समय लाग्नेछ भने म्याक स्टुडियोका लागि १० देखि १२ हप्तासम्म कुर्नुपर्ने हुन सक्छ। दुवै मोडलको प्रि-अर्डर मंगलबारदेखि सुरु भएको छ र सेप्टेम्बर २२, २०२६ देखि शिपिङ हुनेछ। ५१२ जिबी युनिफाइड मेमोरी भएको संस्करण भने अक्टोबरसम्म उपलब्ध नहुने बताइएको छ।
