कञ्चनपुरको कृष्णपुर नगरपालिका–५ स्थित गजरौलामा प्रहरीले ठूलो परिमाणको चरेशसहित दुई जनालाई पक्राउ गरेको छ। बरामद चरेशको तौल १३ किलो ९०५ ग्राम रहेको जिल्ला प्रहरी कार्यालय कञ्चनपुरले जनाएको छ।
गोप्य सूचनाका आधारमा इलाका प्रहरी कार्यालय गुलरिया र अस्थायी प्रहरी पोस्ट गजरौलाबाट खटिएको संयुक्त प्रहरी टोलीले शुक्रबार राति सुदूरपश्चिम प्रदेश ०१–००१ च ४८११ नम्बरको सेतो रंगको बोलेरो पिकअप जिपको जाँच गरेको थियो। सोही क्रममा सवारीसाधनको बोनटमा लुकाएर राखिएको अवस्थामा उक्त परिमाणको चरेश फेला परेको प्रहरी नायब उपरीक्षक तथा प्रवक्ता टेकबहादुर रावतले बताएका छन्।
नियन्त्रणमा लिइएकाहरूमा बझाङको बुंगल नगरपालिका–१ दहबगरका २२ वर्षीय कलक धामी र केदारस्युँ गाउँपालिका–७ काँडाचौरका ५० वर्षीय करन धामी रहेका छन्। प्रवक्ता रावतका अनुसार बोलेरो पिकअपसहित दुवै जनालाई प्रहरीले नियन्त्रणमा लिएको छ।
प्रहरीले सवारीसाधनसहित दुवै जनालाई नियन्त्रणमा लिएर घटनाबारे थप अनुसन्धान अघि बढाएको बताएको छ।
