हतुवागढी गाउँपालिका–४ खैराङभित्रका सामुदायिक विद्यालयहरू अहिले घेराबाराले घेरिएका छन्। विद्यालयका भौतिक सम्पत्तिको सुरक्षा र विद्यार्थीका लागि सुरक्षित तथा व्यवस्थित पठनपाठन वातावरण बनाउने हेतुले वडा कार्यालयले यो अभियान चालेको जनाएको छ।
वडा कार्यक्षेत्रभित्र पर्ने पञ्चकन्या आधारभूत विद्यालय, कालिका आधारभूत विद्यालय, चण्डेश्वरी आधारभूत विद्यालय र सिला सुत्केरी आधारभूत विद्यालयमा घेराबारा निर्माणको काम सकिएको वडाले जानकारी दिएको छ। त्यसैगरी आवश्यकता परेका विद्यालयका भवन तथा अन्य भौतिक संरचनाको मर्मत र सुधारको काम पनि गरिएको छ।
वडाध्यक्ष चन्द्रबहादुर विष्टका अनुसार खुला अवस्थामा रहेका विद्यालय परिसरमा पशुचौपाया छिर्ने, विद्यार्थीको सुरक्षामा चुनौती देखिने र भौतिक सामग्री जोगाउन कठिनाइ हुने गुनासो बारम्बार आएपछि घेराबारा निर्माणलाई प्राथमिकतामा राखिएको हो। विद्यालय सुरक्षित र व्यवस्थित भएपछि मात्र विद्यार्थीका लागि प्रभावकारी सिकाइ वातावरण बन्न सक्ने भन्दै उनले वडाभित्रका सम्पूर्ण सामुदायिक विद्यालयलाई सुरक्षित बनाउने लक्ष्यसहित घेराबारा गरिएको बताए।
स्थानीयको अनुभव
घेराबारा बनेपछि विद्यालय परिसर पहिलेभन्दा व्यवस्थित र सुरक्षित भएको अभिभावक तथा शिक्षकहरू बताउँछन्। स्थानीयवासी गङ्गाबहादुर खड्काका अनुसार परिसर घेरिएपछि विद्यालय क्षेत्रभित्र हुने अनावश्यक आवतजावत कम भएको छ र पशुचौपायाले पुर्याउने क्षतिबाट पनि राहत मिलेको छ। परिसर व्यवस्थित बनेपछि विद्यार्थी नियमित रूपमा विद्यालय आउन सहज भएको उनको भनाइ छ।
गाउँपालिकाको प्राथमिकता
हतुवागढी गाउँपालिकाले सामुदायिक विद्यालयको शैक्षिक गुणस्तर सुधार्न भौतिक पूर्वाधार विकासलाई पनि प्राथमिकतामा राखेको जनाएको छ। गाउँपालिका अध्यक्ष प्रेमकुमार राईका अनुसार विद्यालयको आवश्यकता पहिचान गरेर शैक्षिक एवं भौतिक सुधारका विभिन्न कार्यक्रम सञ्चालनमा छन्। भौतिक अवस्था सुधारसँगै शिक्षण सिकाइलाई प्रभावकारी बनाउने कामलाई पनि प्राथमिकताका साथ अघि बढाइएको उनले बताए।
स्थानीय तह, विद्यालय, शिक्षक, अभिभावक र समुदायबीचको सहकार्यबाट सामुदायिक विद्यालयको शैक्षिक वातावरण सुधार्ने लक्ष्य राखिएको अध्यक्ष राईको भनाइ छ।
