नेपालमा हालै गएका बाढी र पहिरोबाट प्रभावित समुदायका लागि अमेरिकाको टेक्सासस्थित डलासमा बसोबास गर्ने गोरखाको पालुङटारका युवाहरूले तीन करोड रुपैयाँको राहत तथा पुनर्निर्माण कोष सुरु गरेका छन्।
पालुङटार निवासी तथा भिजिट नेपालका अध्यक्ष राजिब राजभटको नेतृत्वमा सुरु गरिएको यो पहल युथ एन्ड डेभलपमेन्टको सहकार्यमा अघि बढाइएको हो। राजभटले तत्काल खोज, उद्धार र स्वास्थ्योपचारका लागि प्रधानमन्त्री दैवी प्रकोप उद्धार कोषमा व्यक्तिगत रूपमा ३० लाख रुपैयाँ प्रदान गरेका छन्।
यस विपत्तिले आयोजकहरूका परिवार र समुदायलाई समेत प्रत्यक्ष असर पुर्याएको छ। जनै पूर्णिमाको अवसरमा गोसाइँकुण्ड जाने क्रममा राजभटका आफन्त तथा पालुङटार र नौखोरका ३० भन्दा बढी छिमेकी हराएका वा बेपत्ता भएकाहरूमा परेका छन्।
‘एक नेपाली, एक रुपैयाँ’ अभियानको ब्यानरमा थालिएको यस कार्यक्रमले राहत र पुनर्निर्माणका लागि व्यापक जनसहयोग जुटाउने लक्ष्य लिएको छ।
कोषको उपयोग
आयोजकहरूले यस कोषलाई स्थानीय निकायसँग समन्वय गरी चरणबद्ध रूपमा खर्च गरिने बताएका छन्। पालुङटार र वरपरका नदी करिडोरमा सार्वजनिक पूर्वाधार पुनर्निर्माण, स्वास्थ्य सेवा पुनः सञ्चालन तथा बालबालिकाको शिक्षा र कल्याणका क्षेत्रलाई प्राथमिकता दिने योजना छ।
