रसुवाको भोटेकोशी बाढीमा बेपत्ता भएका आफन्तको खोजी गर्न कञ्चनपुरका परिवारहरू काठमाडौंसम्म पुगेका छन्। कृष्णपुर नगरपालिका–३ देखतभुलीका नन्दकिशोर राना २२ वर्षीय छोरा क्रिकेशन रानाको खोजीका लागि यतिबेला काठमाडौंमा छन्। क्रिकेशन माथिल्लो त्रिशूली ‘ए’ जलविद्युत् आयोजनामा मजदुरी गर्दै आएका थिए; बाढीपछि उनको अवस्था अज्ञात छ।
छोराको खोजीका लागि पहल गरिदिन नन्दकिशोरले सांसददेखि मन्त्रीसम्मलाई गुहार मागिरहेका छन्। छोरा सकुशल भेटिने आशा दिनप्रतिदिन घट्दै गएको उनी बताउँछन्। जीवितै होस् वा शव नै, केही पत्ता लागोस् भन्ने चाहनाले मात्र आफू काठमाडौं आएको उनको भनाइ छ।
घरमा नाबालिग नातिनी र बुहारी छन्। छोराकै कमाइले परिवारको खर्च चलेको थियो। रानाका अनुसार क्रिकेशन करिब एक वर्षदेखि रसुवा आउजाउ गरी सोही आयोजनामा काम गरिरहेका थिए। घरमा भएको चार कट्ठा जमिनको खेतीले अन्न जुटाउने गरे पनि आर्थिक अवस्था कमजोर भएकै कारण उनलाई यसअघि भारत पनि पठाइएको थियो। छोराको स्वर नसुनिएको बाह्र दिन पुग्दा घरमा आमा रोइरहेको नन्दकिशोरले सुनाए।
यसैबीच, क्रिकेशनसँगै कृष्णपुर–३ कै कालु राना र रिकेश राना पनि बेपत्ता भएका छन्। कालुका भतिजा सोहन रानाका अनुसार बेपत्ता तीनै जनाका साना छोराछोरी छन्। धान खेतीको काम सकेर केही समयअघि मात्र उनीहरू ज्यालादारी काम गर्न गएका थिए। परिवारमा जोकोहीको फोन आउला, कोही बेपत्ता भेटिउला भन्ने आशाले काम गरिरहेको र आँसुबाहेक अहिले केही नरहेको सोहनको भनाइ छ।
कालुकी श्रीमती रेखाका अनुसार छोराछोरीले बुबा आउने आशामा बसेका छन्। पहिले श्रीमान्ले दिनमै तीनपटकसम्म फोन गर्थे, अहिले कैयौँ दिनदेखि सम्पर्क छैन। श्रीमान् बेपत्ता भएपछि परिवार बिचल्लीमा परेको भन्दै उनले सरकारसँग आफन्तको खोजी गरिदिन आग्रह गरेकी छन्।
त्यस्तै, शुक्लाफाँटा नगरपालिका–३ जोनापुरका विनोद डगौरा सोमबार निराश हुँदै काठमाडौंबाट घर फर्किए। उनका २५ वर्षीय छोरा दीपेन्द्र डगौरा लाङ्टाङ जलविद्युत् आयोजनामा कार्यरत छँदा भदौ १० गतेको बाढीमा परी बेपत्ता भएका हुन्। मजदुरीका लागि रसुवा पुगेका दीपेन्द्रको काठमाडौंमा गरिएको खोजीबाट न त जीवित अवस्था पत्ता लाग्यो, न शव नै फेला पर्यो।
एक्लो छोरा युवावस्थामै हराएपछि बुढ्यौलीको सहारा गुमेको पीडा विनोदले सुनाए। गरिबीले नै छोरालाई मजदुरीमा पुर्याएको र बाढीले पूरै परिवारलाई बिचल्लीमा पारेको उनको भनाइ छ। भोटेकोशी बाढीमा बेपत्ता भएकामध्ये कञ्चनपुरका २६ जना अहिले पनि सम्पर्कमा आउन सकेका छैनन्।
