काठमाडौं । नेपालमा आएको विनाशकारी बाढीबाट प्रभावितहरूको उद्धार तथा राहतका लागि संयुक्त राज्य अमेरिकाले ४० लाख अमेरिकी डलरभन्दा बढी मानवीय सहायता परिचालन गरेको छ । अमेरिकी दूतावासका अनुसार यो रकम करिब ६१ करोड नेपाली रुपैयाँ बराबर हुन्छ ।
कार्यवाहक अमेरिकी राजदूत मेगन बोल्डिनले परराष्ट्रमन्त्री शिशिर खनालसँग भेटवार्ता गर्दै बाढीले पुर्याएको मानवीय तथा भौतिक क्षतिप्रति गहिरो सहानुभूति व्यक्त गरेकी छन् । भेटका क्रममा उनले बाढीमा बेपत्ता भएका अमेरिकी नागरिकलगायत अन्य पीडितको खोजी र उद्धारमा नेपाल सरकारले असाधारण तत्परता देखाएको उल्लेख गर्दै आभार पनि प्रकट गरिन् ।
दूतावासका अनुसार अमेरिकाले उपलब्ध गराएको सहायतामा खाद्यान्न, आपत्कालीन राहत सामग्री, बन्दोबस्तीका उपकरण तथा विपद् पीडितको पुनर्लाभका लागि आवश्यक विशिष्टीकृत सामग्री समावेश छन् ।
पहिचानमा एफबीआईको सहयोग
बाढीमा परी ज्यान गुमाएकाको पहिचान गर्न र उनीहरूका परिवारसम्म सही जानकारी पुर्याउन अमेरिकी अनुसन्धान ब्युरो (एफबीआई) का फरेन्सिक विशेषज्ञहरू नेपाल प्रहरीसँग समन्वय गर्दै काम गरिरहेको दूतावासले जनाएको छ ।
आफ्ना नागरिकको सुरक्षालाई सर्वोच्च प्राथमिकता मान्दै दूतावासले आफन्तबारे जानकारी खोज्ने परिवारलाई सहयोग पुर्याउन कन्सुलर सेवा समेत विस्तार गरेको जानकारी दिएको छ ।
नेपालको नेतृत्वमा देशभर जारी विपद् प्रतिकार्यमा सहयोग गर्न अमेरिका नेपालसँग काँधमा काँध मिलाएर अघि बढिरहेको कार्यवाहक राजदूत बोल्डिनले बताएकी छन् । आगामी दिनमा बाढीले पुर्याएको क्षति, विस्थापन तथा मानवीय आवश्यकताको थप आकलन गर्दै नेपाल सरकारसँगको निकट साझेदारी निरन्तर राख्ने प्रतिबद्धता पनि अमेरिकाले जनाएको छ ।
