बागमती प्रदेशका मुख्यमन्त्री किरण थापामगरले बाढी प्रभावितहरूको पुनर्स्थापना गर्दा भोटेकोशी र त्रिशूली नदीका किनार क्षेत्रलाई कुनै पनि हालतमा रोज्न नहुने बताएका छन्। ती क्षेत्रमा बाढीको जोखिम अझै टरेको नभएकाले नदीका दायाँ–बायाँ फेरि बस्ती बसाल्नु उपयुक्त नहुने उनको धारणा छ।
शनिबार भक्तपुरको सूर्यविनायकमा आयोजित एक कार्यक्रमलाई सम्बोधन गर्दै मुख्यमन्त्री थापामगरले यस्तो बताएका हुन्। पुनर्स्थापनाको काम दीर्घकालीन सोचका साथ अघि बढाउनुपर्नेमा उनले जोड दिए।
प्रभावित क्षेत्रका नागरिकका लागि उक्त भूभाग अझै जोखिमपूर्ण रहेको उल्लेख गर्दै उनले स्थानीय तहहरूले जग्गा उपलब्ध गराउने र प्रदेश सरकारले बस्ती निर्माण गर्ने सहमति भएको जानकारी दिए।
नुवाकोटका लागि जग्गा तय, रसुवामा खोजी जारी
मुख्यमन्त्री थापामगरका अनुसार नुवाकोटका लागि विदुर नगरपालिकामा जग्गा पाइसकिएको छ। रसुवाका लागि भने जग्गा हेर्ने काम भइरहेको उनले बताए।
बाढी तथा विपद्बाट प्रभावित नागरिकका लागि स्थायी आवास निर्माण प्रदेश सरकारको पहिलो प्राथमिकतामा रहेको पनि उनले स्पष्ट पारे।
