चितवनको बुढी राप्ती खोलामा शनिबार घोँगी टिप्न गएका एक व्यक्तिको डुबेर मृत्यु भएको छ। मृत्यु हुनेमा खैरहनी नगरपालिका-८ का ४० वर्षीय राजाराम ढकाल रहेको चितवन जिल्ला प्रहरी कार्यालयले जनाएको छ।
प्रहरी नायब उपरीक्षक (डीएसपी) चन्द्रभूषण यादवका अनुसार घोँगी टिप्न गएका व्यक्ति डुबेको जानकारीपछि खैरहनी इलाका प्रहरी कार्यालयको टोलीले दिउँसो साढे २ बजे घटनास्थलबाट उद्धार गरेको थियो। उनलाई तत्काल भरतपुर अस्पताल पुर्याइएकोमा उपचारका क्रममा दिउँसो ३ बजेर ४० मिनेटमा चिकित्सकले मृत घोषणा गरेका थिए।
प्रहरीद्वारा सावधानी अपनाउन आग्रह
बर्खामा नदी, खोला, पोखरी र घोलको पानीको सतह बढेकाले यस्तो बेला पौडी खेल्न, माछा मार्न वा अरू क्रियाकलाप गर्दा सावधानी अपनाउन प्रहरीले स्थानीयलाई आग्रह गरेको छ। मृतकको शव परीक्षणका लागि अस्पतालमा राखिएको छ।
