संयुक्त राष्ट्रसंघको जारी महासभामा अर्जेन्टिनाका राष्ट्रपति हाभियर मिलेईले बेलायतको स्वशासित विदेशी भूभाग फकल्यान्ड टापुका सन्दर्भमा आफ्नो देशको धारणा राखेका छन् । अर्जेन्टिनाले सो टापुलाई लास माल्भिनास भनेर चिन्छ ।
राष्ट्रपति मिलेईले बेलायतले टापुमा अवैध रूपमा कब्जा गरेको र त्यहाँ तेल उत्खननतर्फ अघि बढ्न लागेको भन्दै असहमति जनाएका छन् । बेलायती अनुमतिपत्रअन्तर्गत सञ्चालित ‘सी लायन प्रोजेक्ट’ मार्फत उत्तरी माल्भिनास बेसिनमा पर्ने अर्जेन्टिनाको महाद्वीपीय तटमा तेल उत्खननको काम अघि बढिरहेको उनले बताए ।
यस्ता अनुमतिपत्रलाई अर्जेन्टिनाले गैरकानुनी र अवैध मान्दै आएको उनको भनाइ छ । सो कामका लागि अर्जेन्टिनाबाट कुनै अनुमति लिइएको छैन र यसलाई अन्तर्राष्ट्रिय कानुन, संयुक्त राष्ट्रसंघको समुद्री कानुनसम्बन्धी महासन्धि तथा अर्जेन्टिनाको घरेलु कानुनविपरीत गैरकानुनी कार्य भएको उनले जिकिर गरे ।
आफ्नो अधिकारको रक्षाका लागि शान्तिपूर्ण, व्यावहारिक र प्रभावकारी मार्ग अँगालिएको पनि राष्ट्रपति मिलेईले स्पष्ट पारे ।
यसैक्रममा उनले टापुमा बसोबास गर्ने जनसंख्याका विषयमा अर्जेन्टिनाको धारणा पुनः स्पष्ट पार्न चाहेको कुरा पनि जनाए । विवादित सार्वभौमसत्ता रहेको भूभागमा कब्जा गर्ने शक्तिले बसालेको जनसंख्या भएकाले त्यहाँ ‘आत्मनिर्णयको सिद्धान्त’ लागु हुन नसक्ने उनको तर्क छ ।
