नेपाली कांग्रेसको १५औं महाधिवेशन आइतबारदेखि सुरु भएको छ । काठमाडौंको खुलामञ्चमा उद्घाटन सत्र सुरु गर्ने तयारी भइरहेको छ ।
‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने नारासहित महाधिवेशन अघि बढेको हो ।
महाधिवेशनको बन्दसत्र लगायत अन्य कार्यक्रम सोमबार र मंगलबार अर्थात् १९ र २० असोजमा हुने पार्टीले जानकारी दिएको छ । यस्तै, निर्वाचन कार्यक्रमका लागि २१ र २२ असोज तोकिएको केन्द्रीय निर्वाचन समितिले जनाएको छ ।
समितिले शुक्रबार र शनिबार महाधिवेशन प्रतिनिधिहरूको नाम दर्ता गरेको छ । नाम दर्ताका लागि प्रतिनिधिपिच्छे ३५ सय रुपैयाँ तोकिएको कांग्रेस प्रवक्ता देवराज चालिसेले बताए ।
नाम दर्ता गराउने प्रतिनिधिलाई पार्टीले झोला दिएको छ । सो झोलामा पार्टीको विधान, डायरी, डटपेन, खाना, खाजा तथा नास्ताका लागि कुपन र प्रतिनिधि कार्ड राखिएको छ ।
