काठमाडौं । आर्थिक वर्ष २०८२/८३ मा निकासी तथा पैठारीका लागि अनिवार्य मानिने निकासी पैठारी संकेत नम्बर (एक्जिम कोड) नयाँ दर्ता हुनेभन्दा खारेज हुने संख्या धेरै गुणा बढी भएको भन्सार विभागको तथ्यांकले देखाएको छ । यसले वैदेशिक व्यापारमा संलग्न फर्म तथा कम्पनी उल्लेख्य रूपमा घटिरहेको संकेत गरेको विभागको तथ्यांकले जनाएको छ ।
विभागका अनुसार सो आवमा ४ हजार ७ सय ४८ एक्जिम कोड नयाँ दर्ता भए । सोही अवधिमा खारेज हुने कोडको संख्या २९ हजार ७ सय १५ पुग्यो, जुन नयाँ दर्ताको तुलनामा करिब ६ गुणा बढी हो । यी दुई संख्याबीचको फरकले वैदेशिक व्यापारमा सक्रिय इकाई घट्दै गएको देखाउँछ ।
यसै आवमा ५२ हजार ३० एक्जिम कोड नवीकरण भएका छन् । पुराना कोड नवीकरणतर्फको संख्या नयाँ दर्ताको भन्दा निकै माथि छ, जसले नयाँ व्यापारिक इकाई थपिने क्रम सुस्त भएको संकेत गर्छ ।
सरकारले आर्थिक वर्ष २०७६/७७ देखि एक्जिम कोड अनिवार्य गरेको हो । अहिले यस्तो कोड नयाँ दर्ता र नवीकरण दुवै काम अनलाइनमार्फत गर्न सकिन्छ ।
भन्सार एजेन्ट र बन्डेड वेयरहाउस
गत आवमा भन्सार एजेन्टको लाइसेन्स २६ जनाको खारेज भएको छ भने ३ सय ४२ जनाको नवीकरण भएको छ । विभागको तथ्यांकअनुसार अघिल्लो आवमा नवीकरण भई कायम भन्सार एजेन्टको संख्या ६ सय ६७ थियो ।
बन्डेड वेयरहाउसतर्फ अघिल्लो आवमा ९१ वटा नवीकरण भई कायम भएका थिए । त्यसपछिको आर्थिक वर्ष २०८२/८३ मा १५ वटा बन्डेड वेयरहाउस नयाँ दर्ता भएका छन् र १ सय ४४ वटाको नवीकरण भएको छ ।
