बडादसैँको सातौँ दिन आज देशभर फूलपाती पर्व मनाइँदै छ। नेपालीहरूको सबैभन्दा ठूलो हिन्दु चाडको रूपमा रहेको दसैँमा आफ्ना पुर्ख्यौली घर फर्किएर परिवारसँग भेटघाट गर्ने र ठूलाबडाबाट आशीर्वाद लिने तयारी अधिकांश परिवारमा भइरहेको छ।
परम्परा अनुसार आज शुभ मानिने फूल, पात तथा फलफूल संकलन गरी घरको दसैँघरमा राखिन्छ। काठमाडौंमा भने उपत्यका बाहिरबाट ल्याइएको फूलपाती हनुमानढोका दरबारमा पुर्याएर विधिपूर्वक राखिएको छ। सो अवसरमा हनुमानढोकाबाट जमलसम्म सांस्कृतिक ¥यालीसमेत निकालिएको छ।
घटस्थापनासँगै दसैँ सुरु भए पनि चहलपहल भने फूलपातीदेखि बढ्ने गर्छ। आजैदेखि सरकारी कार्यालय तथा धेरै निजी संस्थानमा दसैँ बिदा सुरु भएको छ, जसले गर्दा घर फर्किनेहरूको भीड बढेको छ।
नेतृत्वको शुभकामना
राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री बलेन्द्र शाह र राष्ट्रिय सभाका अध्यक्ष नारायणप्रसाद दाहालले स्वदेश तथा विदेशमा रहेका नेपालीका लागि सुख, शान्ति, समृद्धि र उत्तम स्वास्थ्यको कामना गर्दै दसैँको शुभकामना दिएका छन्।
राष्ट्रपति पौडेलले आफ्नो सन्देशमा नेपालको जातीय, धार्मिक, सांस्कृतिक तथा भाषिक विविधताका बीच दसैँले पारिवारिक सम्बन्ध, सामाजिक सद्भाव र राष्ट्रिय एकतालाई थप मजबुत बनाउने उल्लेख गरेका छन्। हालैका बाढीबाट प्रभावित परिवारप्रति समवेदना व्यक्त गर्दै उनले विस्थापितहरूको पुनःस्थापनाका लागि सामूहिक प्रयास गर्न आग्रह गरेका छन्।
उपराष्ट्रपति यादवले विजयादशमीलाई मानवीय मूल्य, मर्यादा र सदाचारको उत्सव भनेका छन्। सत्य र न्याय अन्ततः विजयी हुने विश्वासलाई यो पर्वले बलियो बनाउने उनको भनाइ छ। दसैँले सहिष्णुता, आत्मअनुशासन, सहयोग र सद्भाव पनि सिकाउने उनले बताए।
प्रधानमन्त्री शाहले पर्वले परिवारलाई एकै ठाउँमा जोड्ने भए पनि रोजगारीका कारण विदेशमा रहेर घर फर्किन नसकेका नेपालीको बाध्यता रहेको स्वीकार गरेका छन्। जनताको जीवनस्तर सुधार गर्दै विदेश जानुपर्ने अवस्था अन्त्य गर्न सरकार प्रतिबद्ध रहेको उनको भनाइ छ।
रासुवा, नुवाकोट र गोरखासहितका जिल्लामा हालै आएको बाढीको सन्दर्भमा प्रधानमन्त्री शाहले मृत्यु भएकाका परिवारप्रति समवेदना व्यक्त गर्दै घाइतेको शीघ्र स्वास्थ्यलाभको कामना गरेका छन्। विस्थापितहरूको पुनःस्थापनाका लागि सरकार काम गरिरहेको उनले जनाएका छन्।
राष्ट्रिय सभाका अध्यक्ष दाहालले दसैँले राष्ट्रिय एकता, सामाजिक सद्भाव, पारस्परिक सम्मान र सहयोगलाई सुदृढ गर्दै समावेशी तथा समृद्ध नेपाल निर्माणको लक्ष्यमा योगदान पुग्ने बताएका छन्।
