काठमाडौं, अगस्ट १२। नेपालका लागि BYD को आधिकारिक वितरक सिमेक्स इन्कले नाइमा नेपाल मोबिलिटी एक्स्पो २०२६ मा नयाँ पुस्ताको अटो सिरिज सार्वजनिक गरेको छ। सिरिजअन्तर्गत अपग्रेड भएको ATTO 1, नयाँ इन्ट्री–लेवल ATTO 2 र व्यापक रूपमा नवीकरण गरिएको सन् २०२६ को ATTO 3 प्रस्तुत गरिएको हो।
भृकुटीमण्डपमा सोमबारदेखि सुरु भएको एक्स्पोमा यी मोडेल प्रदर्शनीमा राखिएका छन्। कम्पनीले डिजाइन, प्रविधि, आराम र सुविधामा केन्द्रित भई सिरिजलाई अद्यावधिक गरेको बताएको छ। एक्स्पो अगस्ट १६ सम्म चल्नेछ।
ATTO 1 र ATTO 2 का भेरियन्ट र मूल्य
ATTO 1 का Dynamic र Premium दुवै भेरियन्टमा ३६०–डिग्री क्यामेरा राखिएको छ। Premium भेरियन्टमा थप गरी अटो–फोल्डिङ ORVM समेत उपलब्ध छ। Dynamic को मूल्य रु ३० लाख ७५ हजार र Premium को रु ३४ लाख ८० हजार तोकिएको छ।
नयाँ ATTO 2 Essential भेरियन्टमा ४५.१२ kWh ब्याट्री र ३१२ किलोमिटरको WLTP रेन्ज रहेको दाबी गरिएको छ। यसको मूल्य रु ४५ लाख ९५ हजार छ। बजारमा रहेकै ATTO 2 Premium मा भने ५१.१३ kWh ब्याट्री र ३४५ किलोमिटर WLTP रेन्ज छ, र यसको मूल्य रु ४८ लाख ९९ हजार निर्धारण गरिएको छ।
२०२६ ATTO 3 का विशेषता
सन् २०२६ को ATTO 3 मा BYD को Dynamic Dragon Face डिजाइनसहितको नयाँ बाह्य स्वरूप दिइएको छ। यसमा रियर स्पोइलर, उच्च स्थानमा रहेको ब्रेक लाइट र Chinese Knot टेल लाइट समावेश छन्।
भित्री भागमा सफ्ट–टच सतह बढाइएको छ भने कलम–माउन्ट गियर सेलेक्टर, एक्टिभ कुलिङसहितको ५० वाट वायरलेस स्मार्टफोन चार्जर र ८.८–इन्चको फुल–एलसीडी इन्स्ट्रुमेन्ट क्लस्टर जोडिएको छ। ATTO 3 का Advance र Superior दुवै भेरियन्टमा भेन्टिलेटेड फ्रन्ट सिट र आठ स्पिकरको Dirac HD साउन्ड सिस्टम राखिएको छ। ATTO 3 Advanced भेरियन्टको मूल्य रु ६२ लाख ९० हजार छ।
एक्स्पोमा विशेष प्रस्ताव
एक्स्पोको अवधिभर गाडी किन्ने ग्राहकलाई एक वर्षको एप कनेक्टिभिटी (इन्फोटेनमेन्ट), नगद सुविधा, १० वर्षको विस्तारित वारेन्टी, एक वर्षको निःशुल्क बिमा, एक वर्षको निःशुल्क सडक कर र निःशुल्क एक्सेसरीज उपलब्ध गराइने वितरकले जनाएको छ।
BYD को नयाँ अटो लाइनअप एक्स्पोको हल ए, स्टल ए५ मा प्रदर्शनीमा राखिएको छ।
