पर्यटक भिसामा नेपाल भित्रिएर मोरङको कानेपोखरी गाउँपालिका–७, बर्गाछीमा स्वास्थ्य शिविर सञ्चालन गरेका १० विदेशी नागरिकको राहदानी जफत गरी थप अनुसन्धानका लागि अध्यागमन विभागमा पठाइएको छ। गृह मन्त्रालय सचिवालयका अनुसार ती विदेशी नागरिक आवश्यक काम गर्ने अनुमतिबिनै पर्यटक भिसामा आएका थिए।
विदेशी नागरिकसम्बन्धी जिल्ला अनुगमन समितिले उनीहरूको राहदानी अध्यागमन विभागमा पठाएर थप कानुनी प्रक्रिया अघि बढाउने निर्णय गरेको सचिवालयले जनाएको छ। राहदानी जफत गरिएका विदेशी नागरिकलाई विभागमा थप बयान तथा सोधपुछका लागि पठाइएको हो।
ईसाई धर्म प्रचारमा संलग्न रहेको बताइएको संस्था मर्सी डेभलपमेन्टले सो शिविर आयोजना गरेको थियो। पास्टर पावेल डाँगलको आयोजनामा अक्टोबर २५ मा सुरु भएको चारदिने शिविरमा ब्राजिल, क्यानडा र अमेरिकाबाट आएका १० विदेशी चिकित्सकले उपचार सेवा दिएका थिए।
अभिलेखअनुसार ती चिकित्सक अक्टोबर २२ र २३ मा नेपाल प्रवेश गरेका थिए र उनीहरूको पर्यटक भिसा नोभेम्बरको मध्यसम्म मान्य रहेको थियो।
शिविर बसेको तीन कट्ठा जग्गामा स्थानीय किराना व्यवसायी नवराज श्रेष्ठले अस्पताल बनाउने भन्दै छ वटा भवन निर्माण गरेका थिए। ती संरचनामा पछिल्लो समय धार्मिक गतिविधि तथा सामुदायिक कार्यक्रमहरू भएका थिए, जहाँ पास्टर डाँगलले यसअघि ईसाई धार्मिक कक्षा पनि सञ्चालन गरेका थिए।
सो परिसरमा भएका धार्मिक गतिविधिलाई लिएर छिमेकीबीच पछिल्लो समय विवाद उत्पन्न भएपछि त्यसलाई सहज बनाउन श्रेष्ठले यो चिकित्सकीय शिविर आयोजना गरेको बताइन्छ।
