नेपाल प्रिमियर लिग (एनपीएल) को तेस्रो सिजनअन्तर्गत आज (बिहीबार) हुने दोस्रो खेलमा कर्णाली याक्सले टस जितेको छ। टस जितेपछि कर्णालीले पहिला बलिङ गर्ने निर्णय लिएको छ भने विराटनगर किंग्सले पहिला ब्याटिङको निम्तो पाएको छ।
कीर्तिपुरस्थित त्रिवि अन्तर्राष्ट्रिय क्रिकेट रंगशालामा हुने यो खेल साँझ ५ बजेदेखि सुरु हुनेछ। टस हारेसँगै विराटनगरले पहिले ब्याटिङ गर्दै लक्ष्य खडा गर्ने रणनीति अँगालेको छ।
कर्णाली याक्सले प्रतियोगिताको आफ्नो पहिलो खेलमा जनकपुर बोल्ट्सलाई १९ रनले पराजित गर्दै सुखद सुरुवात गरेको थियो। आजको खेलमा पनि जित निकाल्दै टिम आफ्नो अपराजित यात्रा कायम राख्ने लक्ष्यका साथ मैदान उत्रिएको छ।
विराटनगर किंग्स भने पहिलो खेलमा चितवन राइनोजसँग ८ रनको झिनो अन्तरले पराजित भएको थियो। आजको खेलमार्फत पुनरागमन गर्ने योजनामा विराटनगर रहेको छ।
