बिहीबार दिउँसोपछि काठमाडौं उपत्यकाका धेरै भागमा हल्का वर्षा भएको छ। काठमाडौं, ललितपुर र भक्तपुरका अधिकांश क्षेत्रमा फैलिएको यो वर्षाले उपत्यकाको तापक्रम घटाएको छ, जसका कारण दिनभर चिसो महसुस गरिएको छ।
वर्षासँगै हावामा तैरिएको धुलो केही मात्रामा तल बसेको छ र वायु प्रदूषणको स्तर पनि केही कम भएको छ। शुष्क मौसममा उपत्यकामा बढ्ने धुलोको मात्रालाई यो वर्षाले रोक्न सहयोग पुगेको छ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार पश्चिमी वायु र स्थानीय वायुको आंशिक प्रभावले मौसम बदली भई यस्तो छिटपुट वर्षा भएको हो।
महाशाखाले बिहीबार राति पनि उपत्यकासहित पहाडी भूभागका एक–दुई स्थानमा मेघगर्जनसहित हल्का वर्षा हुन सक्ने जनाएको छ।
