नेपाली चलचित्रको घरेलु बजारमा ‘पार्वती’ले आफ्नो पकड बलियो बनाएको छ। प्रदर्शनको तेस्रो सप्ताहामा रहेको यो चलचित्रले ग्रस कलेक्सनमा २ करोड रुपैयाँको आँकडा नाघेको छ र यस वर्ष प्रदर्शन भएका सफल नेपाली चलचित्रको सूचीमा आफूलाई उभ्याएको छ।
चलचित्र विकास बोर्डको तथ्यांकअनुसार भदौ २८ गतेसम्म ‘पार्वती’को ग्रस आम्दानी २ करोड ५ लाख ८५ हजार रुपैयाँभन्दा माथि पुगेको छ। यही अवधिमा चलचित्रका ७३ हजारभन्दा बढी टिकट बिक्री भएका छन्।
भदौ १९ गतेदेखि प्रदर्शनमा आएको ‘तिनीहरू’ले पनि बक्स अफिसमा उत्साहजनक सुरुवात गरेको छ। १० दिनको अवधिमा यसले करिब ८६ लाख रुपैयाँ ग्रस कमाइ गरेको छ र ९० लाख रुपैयाँको आँकडातर्फ अघि बढिरहेको छ। चलचित्र हेर्ने दर्शकको संख्या २४ हजारभन्दा माथि पुगेको छ।
गौँथलीको वर्चस्व कायमै
बजारमा आफ्नो दबदबा जोगाइराखेको ‘गौँथली’को व्यापार भने अझ उच्च छ। प्रदर्शनको ५९औँ दिनसम्म पुग्दा चलचित्रले करिब २५ करोड ९४ लाख रुपैयाँ ग्रस कलेक्सन गरिसकेको छ। यसलाई हेर्ने दर्शकको संख्या ९ लाख ४० हजारभन्दा बढी पुगेको छ।
समग्रमा हेर्दा ‘गौँथली’ले ऐतिहासिक कमाइ गरिरहेको छ भने ‘पार्वती’ले पनि चालु वर्षकै सफल नेपाली चलचित्रमध्ये एकका रूपमा आफ्नो स्थान सुरक्षित गरेको छ। नयाँ प्रदर्शनमा रहेको ‘तिनीहरू’को व्यापारिक यात्रा भने आउँदा दिनमा थप रोचक बन्ने देखिएको छ।
