गृहमन्त्री सुधन गुरुङविरुद्ध सामाजिक सञ्जालमा भ्रामक भिडियो राखेको आरोपमा प्रहरीले नेपाली कम्युनिष्ट पार्टी (नेकपा) का नेता गोविन्द अधिकारीलाई पक्राउ गरेको छ । कास्कीको पोखरा निवासी ४१ वर्षीय अधिकारी वाईसीएलसँग पनि आबद्ध रहेको बताइएको छ ।
गृहमन्त्री गुरुङ गोरखाका बासिन्दा हुन् । शनिबार र आइतबार गोरखा सदरमुकाममा गृहमन्त्रीको राजीनामा माग गर्दै प्रदर्शन भएको भन्दै सामाजिक सञ्जालमा भिडियो सार्वजनिक गरिएको थियो । सोही भिडियोका सम्बन्धमा अधिकारीमाथि कारबाही भएको हो ।
अधिकारीलाई सोमबार कास्कीबाट पक्राउ गरी गोरखा ल्याइएको जिल्ला प्रहरी कार्यालय गोरखाका डीएसपी राजकुमार श्रेष्ठले जानकारी दिए । मंगलबार सार्वजनिक शान्ति विरुद्धको कसुरमा उनीविरुद्ध मुद्दा दर्ता भएको र पाँच दिनको म्याद थप गरेर अनुसन्धान भइरहेको पनि श्रेष्ठले बताए ।
यसैबीच जिल्ला प्रशासन कार्यालय गोरखाले आइतबार प्रेस विज्ञप्ति जारी गर्दै जिल्लामा नभएको र नदेखिएको अवास्तविक भिडियो फुटेजप्रति विश्वास नगर्न आग्रह गरेको थियो ।
वाईसीएलको आपत्ति
वाईसीएल कास्कीले भने प्रेस विज्ञप्ति निकालेर गृह मन्त्रालयको निर्देशनमा अधिकारी पक्राउ गरिएको जनाउँदै ध्यानाकर्षण व्यक्त गरेको छ । सरकारको आलोचना गरेकै कारण राजनीतिक आस्थासँग जोडेर धरपकड गरिएको भन्दै उसले विरोध जनाएको छ र अधिकारीको निसर्त रिहाईको माग गरेको छ ।
