अभिनेता दीपकराज गिरीले सामाजिक सञ्जालमा बढ्दै गएको गालीगलौज र बहिष्कार अभियानविरुद्ध शनिबार व्यङ्ग्यात्मक टिप्पणी गरेका छन्। सामाजिक सञ्जालमा लामो स्टाटस लेख्दै उनले गाली अब व्यक्तिगत आक्रोश नभई सञ्जालकै साझा संस्कृति बनिसकेको टिप्पणी गरेका छन्।
असोज ३१ गतेदेखि प्रदर्शनमा आएको चलचित्र 'छ माया छपक्कै २' सार्वजनिक भएयता गिरी लगातार नकारात्मक प्रतिक्रिया र बहिष्कार अभियानको केन्द्रमा परेका छन्। पोस्टर हेरेरै बहिष्कार गर्ने, कसैको भनाइलाई फरक अर्थ लगाएर तिरस्कार गर्ने र एक समूहले अर्को समूहलाई बहिष्कार गर्ने क्रम चलिरहेको उनले आफ्नो स्टाटसमा उल्लेख गरेका छन्। यस्तो अवस्थामा चारैतिर घृणा र गालीगलौज मात्रै देखिने उनको भनाइ छ।
सुरुसुरुमा सञ्जालका नकारात्मक टिप्पणीले आफूलाई हप्तौँसम्म तनावमा राखेको र रातभर निद्रा नलाग्ने गरेको उनले सम्झिएका छन्। तर अहिले त्यो अवस्था बदलिइसकेको छ। दिनहुँजसो गाली सुन्दा आफूलाई यसको बानी परेको र केही दिन गाली नआए उल्टै केही अपुरो भएजस्तो महसुस हुने गरेको गिरीले बताएका छन्।
वरिष्ठ कलाकार पनि छुटेनन्
वरिष्ठ कलाकारहरूसमेत गालीबाट मुक्त हुन नसकेको देखेपछि आफूलाई यो समस्या व्यक्तिगत नभई सामाजिक सञ्जालको साझा समस्या लागेको उनले जनाएका छन्। हरिवंश दाइलाई समेत गाली भएको देखेपछि आफ्नो भ्रम टुटेको र गाली दिने काम नै संस्कृति बनिसकेको उनको ठम्याइ छ। सञ्जाल फैलिएसँगै गालीगलौज वैधानिकजस्तै बनिसकेको र असंवेदनशीलताले जरा गाडेको उनले टिप्पणी गरेका छन्।
सञ्जालमा जथाभावी लेख्नेविरुद्धको कानुनी कारबाही कमजोर रहेकोप्रति पनि गिरीले असन्तुष्टि व्यक्त गरेका छन्। गाली गर्ने धेरै भएपछि साइबर ब्युरोले सोधपुछ गरेर छाड्ने गरेको र सानातिना मुद्दा यति धेरै भइसकेका छन् कि कसलाई समात्ने भन्ने अवस्था आएको उनको भनाइ छ। साहित्यकार, कलाकार, नेता वा अभियन्ता कोही पनि गालीबाट अछुत नरहेको उनले उल्लेख गरेका छन्।
ज्योतिषको सुझाव र पूजाको फोटो
गालीबाट हैरान भएपछि आफूले ज्योतिषीलाई फोन गरेको प्रसङ्ग पनि उनले रोचक ढङ्गले सुनाएका छन्। ज्योतिषले साढेसाती लागेको भन्दै पूजा गर्न सुझाएपछि आफूले पूजा गरेको र त्यसैको फोटो सञ्जालमा राखेको उनले बताए। तर त्यसपछि पाप गरेर अब धर्मकर्मतिर लागेको भन्दै झन् बढी गाली आएपछि आफ्नो निद्रा उडेको उनको भनाइ छ।
कमेन्ट बक्समा आफू गाली खाएको देखेर श्रीमतीले समेत व्यङ्ग्य गर्दै गाली गर्ने गरेको गिरीले खुलाएका छन्। तर महजोडीले पनि गाली खाएको देखेपछि भने आफूले चित्त बुझाउँदै कमेन्ट हेर्नै छोडेको उनले जनाएका छन्। अन्त्यमा उनले गालीलाई गायत्री मन्त्र सम्झेर जीवनसँगै गाँसेर, नरिसाई हाँसेर बाँच्न सिक्नुपर्ने सुझाव दिएका छन्।
