सरकार र मिटरब्याज पीडितबीचको तेस्रो चरणको वार्ता बुधबार साँझ सम्पन्न भए पनि कुनै ठोस निष्कर्ष निस्कन सकेको छैन। वार्तामा पीडित पक्षले आन्दोलन स्थगित नगरी सम्झौता नभएसम्म वार्ता र संघर्ष सँगसँगै जारी रहने अडान राखेको छ।
सरकारी टोलीले भने पीडितलाई आन्दोलन रोकेर काठमाडौंमा आएर अन्तिम सम्झौता गर्न प्रस्ताव गरेको थियो। सरकारले पीडितका अधिकांश माग स्वीकार गर्न तयार रहे पनि केही भाषा सच्याउन आवश्यक रहेको जनाएको छ। तर पीडितले गृहमन्त्री सुधन गुरुङले स्वीकार गरेको सहमति पत्रलाई जस्ताको तस्तै हस्ताक्षर गरी आधिकारिक मान्यता दिनुपर्ने माग राखेका छन्।
मिटरब्याज पीडित संघर्ष समितिका अध्यक्ष अवधेश कुशवाहले भने, 'हामीले आन्दोलन स्थगित नगरी सम्झौता नभएसम्म वार्ता र संघर्ष सँगसँगै जाने बताएका छौं। हाम्रो संघर्ष जारी छ।' पीडितले लिखित सम्झौतामा हस्ताक्षर नभए घर नफर्किने अडान राखेका छन्।
यसअघि गृहमन्त्री सुधन गुरुङ स्वयं पीडितलाई भेट्न बारा पुगेका थिए। उनकै उपस्थितिमा दुई चरणको वार्ता भइसकेको छ। पीडित जनकपुरबाट पैदल यात्रा गर्दै काठमाडौंतर्फ अग्रसर छन्। यात्राको क्रममा उनीहरूले बारामा सरकारी टोलीसँग वार्ता गरेका थिए।
