नेपाली कांग्रेसका उपसभापति मधु आचार्यले सरकार प्रतिशोध, क्रोध, भय र भ्रमका आधारमा सञ्चालन भइरहेको आरोप लगाएका छन्। रिपोर्टर्स क्लब नेपालले सोमबार काठमाडौंमा आयोजना गरेको साक्षात्कारमा बोल्दै उनले सरकारको कामकारबाहीप्रति यस्तो टिप्पणी गरेका हुन्।
सरकार गठन भएको छ महिना नपुग्दै पारदर्शितामाथि गम्भीर प्रश्न उठ्न थालेको आचार्यले बताए। सरकारको कार्यशैली, निर्णय प्रक्रिया र सरोकारवालासँगको संवादमा देखिएको कमजोरीका कारण मुलुकमा विचौलियाहरू हाबी हुने अवस्था सिर्जना भएको उनको भनाइ छ।
कार्यकारी निकाय र सरोकारवालाबीच नियमित संवाद हुन नसक्दा विचौलियाले सरकारकै नाममा आफ्नो स्वार्थ पूरा गर्ने अवसर पाइरहेको उनले औंल्याए। यसलाई सुधार्नका लागि नीतिगत तहमा खुलापन र निरन्तर संवाद आवश्यक रहेको उनको जोड थियो।
दानबहादुर कार्कीलाई पदबाट हटाइएको विषयमा पनि सरकारले आफ्नो धारणा स्पष्ट पार्नुपर्ने उनले माग गरेका छन्। सो प्रकरणमा भएका निर्णयको आधार र प्रक्रियाबारे सरकार मौन रहनु उपयुक्त नहुने उनको भनाइ छ।
अध्यादेशको बाटोप्रति असहमति
सरकारले संसद्लाई छलेर अध्यादेशमार्फत शासन सञ्चालन गर्न खोजेको आचार्यको टिप्पणी छ। विधायिकाको भूमिकालाई कमजोर बनाउन नहुने उनले बताए।
अर्को प्रसंगमा उनले प्रमुख प्रतिपक्षी दल सरकारलाई आवश्यक सहयोग गर्न तयार रहे पनि सरकारले सहकार्यको वातावरण नबनाएको आरोप लगाए। सहयोगका लागि खुला रहे पनि सरकारले संवाद र विश्वासको वातावरण निर्माण नगरेको उनको दाबी छ।
