पाँचथर र ताप्लेजुङको सीमामा रहेको तिम्बुङ पोखरी यतिबेला फेरि चहलपहलले भरिन थालेको छ । वर्षा सुरु भएसँगै यहाँको पहिचान बनेको पिरामिड आकारको केन्जो फूल फुल्न थालेपछि यो हिमाली गन्तव्यको सौन्दर्य झनै बढेको छ ।
हरिया डाँडाकाँडा, चिसो हावा, फराकिलो खर्क र हिमाली जीवनशैलीले सजिएको यो क्षेत्रमा अहिले प्रकृतिप्रेमीको भीड लाग्न थालेको छ । समुद्री सतहबाट करिब चार हजार ३३५ मिटर उचाइमा रहेको तिम्बुङ पोखरीको मनमोहक दृश्यले आगन्तुकलाई मोहित पार्छ । चारैतिर फैलिएका हरिया पहाड, कुहिरोले छोप्दै–उघार्दै गरेका दृश्य र बीचमा शान्त पोखरीले यात्रुलाई समय रोकिएको अनुभूति गराउँछ ।
केन्जो फूलको विशेषता यसको पिरामिडजस्तो आकार हो, जसले डाँडाकाँडालाई रङ्गीचङ्गी बनाएको छ । यो फूल फुल्न थालेसँगै तिम्बुङ भ्रमणको मुख्य सिजन पनि सुरु हुन्छ । स्थानीय पर्यटन व्यवसायी अमिर राईका अनुसार नेपालका विभिन्न जिल्ला र भारतको सिक्किमबाट समेत पर्यटक आउने गरेका छन् । पर्यटकको चाप बढेसँगै स्थानीयले सञ्चालन गरेका होमस्टेहरू पनि व्यस्त हुन थालेका छन् । उनका अनुसार पछिल्ला वर्षहरूमा तिम्बुङको लोकप्रियता बढ्दो क्रममा छ र हरेक वर्ष नयाँ पर्यटक थपिने गरेका छन् ।
तिम्बुङ केवल प्राकृतिक सौन्दर्यकै लागि मात्र प्रसिद्ध छैन, यो धार्मिक आस्थाको केन्द्र पनि हो । स्थानीय समुदायले पोखरीमा पूजा–आराधना गर्ने परम्परा आज पनि कायम छ । दर्शनार्थीले चढाएका सिक्का पोखरीको स्वच्छ पानीमा टल्किरहेको देख्न सकिन्छ । धार्मिक विश्वास र प्राकृतिक सुन्दरताको यो संगमले तिम्बुङलाई अझ विशेष बनाएको छ । पोखरी वरिपरि चरिरहेका याक, चौँरी र भेँडाका बथानले हिमाली जीवनशैलीको झल्को दिन्छ ।
तिम्बुङ पुग्न आवतजावत सहज छैन तर त्यति गाह्रो पनि छैन । झापाको बिर्तामोड वा पाँचथरको फिदिमबाट कालीखोलासम्म सडकमार्ग हुँदै पुग्न सकिन्छ । त्यसपछि दुई दिनको पदयात्राले तिम्बुङ पोखरी पुर्याउँछ । यात्राका क्रममा ग्रामीण जीवन, जंगल, खोला र हिमाली भेगको प्राकृतिक सौन्दर्यले यात्रा आफैंमा स्मरणीय अनुभव बनाउँछ ।
सामान्यतया साउनदेखि कात्तिक र फागुनदेखि चैतसम्म तिम्बुङ भ्रमणको मुख्य सिजन मानिन्छ । तर पछिल्ला वर्षहरूमा अन्य महिनामा पनि पर्यटक आउने क्रम बढेको छ । पूर्वी नेपालको यो हिमाली गन्तव्य अहिले साहसिक पदयात्रा, प्रकृतिप्रेम र स्थानीय संस्कृति एकै ठाउँमा अनुभव गर्न चाहनेहरूका लागि उत्कृष्ट विकल्प बन्दै गएको छ । शहरी भीडभाडबाट टाढा रहेर हिमाली शान्ति र प्रकृतिको अनुपम सौन्दर्य खोज्नेहरूका लागि केन्जोले ढाकिएको तिम्बुङ पोखरी अहिले उपयुक्त गन्तव्य बनेको छ ।