नेपाली कम्युनिस्ट पार्टी (नेकपा) का संयोजक पुष्पकमल दाहालले मुलुकमा फेरि नयाँ किसिमको आन्दोलन आवश्यक रहेको उल्लेख गर्दै आफू त्यसको तयारीमा जुटेको बताएका छन्। जनताको अधिकारलाई अझ माथिल्लो तहमा पुर्याउने तथा संविधानलाई परिमार्जन र परिष्कृत गर्ने उद्देश्यले यस्तो आन्दोलन आवश्यक भएको उनको भनाइ छ।
बिहीबार आयोजित एक कार्यक्रममा सम्बोधन गर्दै संयोजक दाहालले हालको विश्व परिवेश, दक्षिण एसियाको अवस्था र नेपालको सन्दर्भसँग मेल खाने नयाँ आन्दोलनको खाँचो औंल्याए। आफ्नो उमेर बढे पनि क्रान्तिकारी विचार भने कमजोर नरहेको उनले दाबी गरे।
भौतिक उमेरले ७२ वर्ष नाघेर ७३ वर्ष लाग्दै गरे पनि विचारका हिसाबले आफू अर्को विद्रोह र आन्दोलनको तयारीमा रहेको उनले स्पष्ट पारे। कठिन परिस्थितिबाट आत्तिनु नपर्ने र रातपछि दिन आउने यथार्थ सम्झन उनले नेता–कार्यकर्तालाई आग्रह गरे।
राष्ट्रिय जागरण अभियानको तयारी
पार्टी अहिले आन्तरिक रूपमा राष्ट्रिय जागरण अभियानको तयारीमा जुटेको जानकारी दिँदै उनले त्यसपछि देशव्यापी आन्दोलन अघि बढ्ने बताए। जागरण अभियानपछि मुलुकमा नयाँ प्रकृतिको आन्दोलन आवश्यक रहेको र पार्टी त्यही प्रक्रियामा रहेको उनको भनाइ थियो।
जनतालाई मुक्त गर्ने, संविधानलाई परिमार्जन तथा परिष्कृत गर्ने र जनताको अधिकारलाई नयाँ उचाइमा पुर्याउने आन्दोलनको तयारी आफूले गरिरहेको संयोजक दाहालले उल्लेख गरे।
निराशावादबारे नेतृत्वको चेतावनी
पार्टी पंक्तिभित्र निराशा छाएको र नकारात्मक कुरा मात्र सुनिने गरेको गुनासोतर्फ लक्षित गर्दै उनले कम्युनिस्ट आन्दोलन सधैं आशावादी हुनुपर्ने बताए। मार्क्सवाद र कम्युनिस्ट आन्दोलनले आशावादिता, उज्यालो र सकारात्मकताको पक्षपोषण गर्ने भन्दै उनले निराशा र अन्धकारको पक्षमा उभिन नहुने धारणा राखे।
नेता–कार्यकर्ता आफू निराशाको कित्तामा उभिने कि आशावादिताको कित्तामा भन्ने कुरामा प्रस्ट हुनुपर्ने उनको भनाइ थियो। कार्ल मार्क्स, फ्रेडरिक एंगेल्स र पेरिस कम्युनको ऐतिहासिक सन्दर्भ जोड्दै विचार सही भए क्रान्ति सम्भव रहेको उनले बताए।
कलाका माध्यमबाट जनयुद्धबारे विमर्श सुरु गरेकोमा कलाकारहरूलाई धन्यवाद दिँदै उनले सहिदका सपना र क्रान्तिको संकल्पलाई निरन्तर अगाडि बढाउनुपर्नेमा जोड दिए।
