प्रजातान्त्रिक गणतन्त्र कंगो (डीआरसी) मा इबोला भाइरसको प्रकोप तीव्र भएको छ। विश्व स्वास्थ्य संगठन (डब्ल्यूएचओ) ले हालसम्म दुई हजार एक सय जनामा संक्रमण पुष्टि भएको जानकारी दिएको छ। जेनेभास्थित पत्रकार सम्मेलनमा डब्ल्यूएचओका महानिर्देशक टेड्रोस एड्हानोम गेब्रेयससले यो जानकारी दिँदै सक्रिय सशस्त्र द्वन्द्व, असुरक्षा र सामुदायिक प्रतिरोधले प्रभावित क्षेत्रमा उपचार कार्यमा बाधा पुगेको बताए।
डीआरसी स्वास्थ्य अधिकारीहरूको पछिल्लो प्रतिवेदन अनुसार देशमा संक्रमणबाट ८२८ जनाको मृत्यु भएको छ। संक्रमितको कुल संख्या दुई हजार १२४ पुगेको छ। महानिर्देशक गेब्रेयससले निगरानी, उपचार र अनुसन्धानमा उल्लेखनीय प्रयासहरू भए पनि उच्च प्रकोपले नियन्त्रण प्रयासमा चुनौती थपेको उल्लेख गरे।
अधिकारीहरूका अनुसार बुन्डिबुग्यो इबोला भाइरसको प्रकोप हालसम्म इटुरी, उत्तरी किवु, दक्षिण किवु, हाट-उले र सोपा गरी पाँच प्रान्तहरूमा फैलिसकेको छ। पुष्टि भएका संक्रमणमध्ये लगभग ९० प्रतिशत इटुरी प्रान्तमा रहेका छन्। छिमेकी मुलुक युगान्डामा समेत संक्रमण द्रुत रूपमा फैलिन सक्ने चिन्ता अधिकारीहरूले व्यक्त गरेका छन्।
डीआरसी सरकारले गत मे १५ मा आधिकारिक रूपमा इबोला महामारी घोषणा गरेको थियो। यसअघि पनि देशमा इबोलाका धेरै प्रकोप देखिसकेका छन्।
