विश्वकप विजेता स्पेनी प्रशिक्षक लुइस डे ला फुएन्तेले उपाधि यात्राप्रति गर्व व्यक्त गरेका छन्। फाइनलमा अर्जेन्टिनालाई हराएपछि ६५ वर्षीय फुएन्तेले भने, ‘इमान्दारीपूर्वक भन्नुपर्दा अहिले म गर्वले भरिएको छु।’ उनी विश्वकप जित्ने सबैभन्दा पाको उमेरका प्रशिक्षक बनेका छन्।
उनले थपे, ‘यो टोलीलाई उपाधिसम्म पुर्याउन पाउनु मेरो लागि भाग्यको कुरा हो।’ फाइनलमा निर्णायक गोल गरेका फेरान टोरेसले पनि खुसी व्यक्त गर्दै भने, ‘यो गोल वास्तवमा चार करोड ७० लाख स्पेनीले गरेका हुन्।’ उनले स्पेनको जनसङ्ख्यालाई सङ्केत गर्दै यस्तो बताए। ‘जब विपक्षी टोलीमा लियोनल मेसीजस्ता खेलाडी हुन्छन्, सबै सशङ्कित हुन्छन्। तर हामीले फेरि एकपटक टोली खेल खेल्यौं आफैंमा विश्वास गर्दै।’
गोल्डेन बल अवार्ड जितेका रोड्रीले फाइनलपछि भने, ‘मलाई लाग्छ, अहिले म बादलसँग उडिरहेको जस्तो महसुस गरिरहेको छु। खेलअघि मैले सबै खेलाडीलाई विपक्षीसँग आँखा जुधाएर खेल्न भनेको थिएँ। एउटा खेलाडीले फेरि विश्वकप जित्ने सम्भावना हुँदैन।’